پیشەسازی جە هۆرامانەنە
ئەوەنویستەی و دەسکاریکەرڎەی: ئەسعەد ڕەشید
بەشۍ یەکەمە

فرەو ناوچەکاو هۆرامانینە، کارە دەسییەکۍ هەر مەنېنۍ، پېسە ئاسنگەری، چۊتاشی، چەخماخسازی، ئۊسابەنایی، جۊڵایی، خومچی، قەزازی، خەیاتی، پینەچی، کڵاشچنی، هەلاجی، ئاشەوانی، سەنگچنی(سەنگتاشی)، دەباخچی، مسگەری، ناڵبەڼی، خەڕاتی.
پیشەسازی دەسی ئاسنگەری، جە بارێ ئاسایینە بەکارمێ، بە چن ئامېرێ ساکارۍ و سادۍ، پېسە(مووشەدەمەی، دەسگا، مەبرەڎ، چەکۊش، گیرە، مەنگەنە، مەقاش، کوورۍ). ئاسنگەر مەتاوۊ پەنجەرە، گاسن، تەوەر، تەوەرداس، ساج، بېڵە، دېکپا، سېخە، وەشکەرۊن، کە پەنەۋازیۍ ڕوانەو خەڵکینۍ.
ئاسنگەری هۆرامانەنە، بە(خەڵووزی دارین، مووشەدەمەی دەسی)، کریۊن، پەوکەی تەواناو درووسکەردەی ئامرازە گۆرەکاشا، نېیەن.
چۊتاشیچ جە هۆرامانەنە، پېسە ئاسنگەری، بە(چەکوش، مشاری دەسی، ترېشتە، گاز و پلاییس، مەنگەنە، ....هتد)، کریۊن، یانی سەرەتایین، بە تەنیا پەنەۋازیە سەرەتاییەکا وەشکەران.
چۊتاش و ناوچەو هۆرامانی، تەواناو درووسکەردەی(بەرەوپەنجەرە، دەڵاقە، تاشای دیمەکۍ، دەسەو زەنگەنی و خاکەنازۍ و تەوەر و تەوەرداس، وەشکەردەی باوڵی گۊلانەی و یەخدان، کورسی، قەرەوېڵە، چوارپا، کەنتور، پنۍ، لەتەرۍ، کوچەڵە، هەزارپېشە) بېیەن. دارو(تفۍ و بەلوو و ۋەزۍ و سنجەی و شېڵانۍ)، پەی کەرەسەو چۊتاشی بەکارئامێنۍ.[1]