#میرزای لوڕستانی#

حالا جە ئیشان نەکەرین گوفتار
بدەریم ئەخبار ئەمیری سالار
چۇن شین بەو مەکان شکاری یاران
وەڵا بین نە دەشت تەمام سواران
عاجز بی ئەمیر ئەو ڕۊ جە شکار
واتش وە بەکر ئەمیری نامدار
لەزەتێ نەدیم ئېم ڕۊ جەی شکار
غەیرەز عاجزی و ئەندۇھی زگار
بۍ ئەمیری مەم حەرامەن ئەی ڕاو
ئازارشان وەرد سوارانی داو
ئاما بە جواب بەکر بېقەرار
عەرزکەرد وە خدمەت ئەمیری نامدار
ئامام وەقتی سوبح بە دەرۇن ئەخبار
مەم ئازار دارەن مەشۊ وە شکار
جەو درەنگی دا بەند بی زۇانم
چەنی تۊ نەبی دەنگ و دۇانم
وەرنە شەھزادەی بە وېنەی ئەمیر
ئازارداری کېن غەریب و زویر
ئەو چە مناسب بەر شی وە شکار
جە لای بوزورگان ئین مەنمانۊ عار
ئەمیر چۇن شنەفت ئافەرین وانا
واتش چاوەشان بکەران ھانا
سواران جەم بان بەتاڵەن شکار
بپېچان عەنان تا مەشین وە شار
تاجەدین ئاوازکەرد وە بەنگینە
ئەی یاری دوڵدار کارێ بوینە
بە وېم مەزانۇن مەم چەنی یاوەر
نە سەرای ئەمیر نیشتەن بېخەبەر
ھیچ فامش نېیەن جە سەودای دڵدار
خەبەردارش کەر وەر جە کار و زار
بەنگین چۇن ئەژنی بەرئاما وە تاو
جودا بی جە قەلب سوارانی داو
خەیلێ تەئخیر کەرد بە ئەمری قەدیر
داخڵ بی بەنگین واسڵ بی ئەمیر
ئاما وە سەرا بەنگین وە شتاب
دیش کە سەرمەستن ھەر دۇشان نە خواب
واتش ئەی ئەمیر خوفتەی بېخەبەر
بەرخواﮪ کە ئافاق ئاھېر گېرت نە وەر
ئەمیر زینەدین یاوا بە حەسار
پېیاد بی جە زین ئاما بېقەرار
شین وە یەختەخان تەمام سەمەندان
ژەندن ئۊتراغان باز و باڵەبان
شاھین و سەقەر کەردن کلاوە
ھا وەقتەن ئەمیر بەیۊ جە لاوە
زار زار گرېوا بەنگین بە زەبۇن
ئەسرینێ ئاما ڕاست وە ڕۇی خاتۇن
جە تابی گەرمی ئەسرینی بەنگین
خاتۇن بېدار بی جە خاوی شیرین
ئاوازکەرد وە مەم خاتۇن بېسامان
ھۊرېزە بدېیە چېش پېمان ئامان
چاوشی ئەمیر نیشتەن جە لامان
نامۇسمان شییەن تا ئاخر زەمان
مەم چۇن گوشاد کەرد نەرگسی شەھلا
دیش کە بەنگینەن ئیستادەن وە پا
فەڕۊخی ئەمیر جە ئامای ئەو یار
ئاخر سەرئەنجام ئاما نە گوفتار
[1]