#بېسارانی#
تا بە کەی نۊشۇ, تا بە کەی نۊشۇ
یا ڕەب جامی خەم، تا بە کەی نۊشۇ؟
تا کەی بە خەمین لۊنگی خەم پۊشۇ؟
تا کەی چۇن کۇرەی ئایېر بجۊشۇ؟
تا کەی هەناسەم چۇن سېیا تەم بۊ؟
تا کەی کونجی دڵ خەزېنەی خەم بۊ؟
تا کەی کزەی دڵ بە ستېزە بۊ؟
تا کەی بەندی جەرگ، ڕېزە ڕېزە بۊ؟
تا کەی چەنی بەخت، بە دان بسازۇ؟
تا کەی وە مەرگم ئاوات بوازۇ؟
تا کەی بسۊچۇن، نەبۇن بە زوخاڵ؟
تا کەی بېدېیان بکەرۇن بە ماڵ؟
ئینسافەن وەسەن، نېیازمەندی دڵ
نمازە وەحەسرەت، سەر بەرۇن وەگڵ
[1]