#ئاغا عەنایەت#
دۆستەکەی گېیانی ڕۆستەمی نەژاد
نامەی شیرینت خەمان دا وە باد
ئەشعاری مەربۇت مەعدەنی شعۇر
سەیقەل کریابۍ بە وېنەی بلۇر
موناجاتی خاس دڵ پەسەندیدە
وانام و ساوام وە هەر دۇ دیدە
ئاهەنگی ئەشعار فیردەوسیت وەندم
جە دوڕ ئەفشانیت من حەیران مەندم
ئەشعارت جە لام وېنەی شەکەرەن
من جە واتەی وېم قەلبم پەکەرەن
حەیفەن قاتی بۊ ئەو شیرین وەی تەڵخ
ئەو ئاوی سافەن ئېڎ لەجەن هەم بەڵخ
ئەو دانەی گوهەر ئېڎ سەنگی خاران
ئەو پارچەی حەریر ئېڎ کۊنەی شاران
ئەو خشتی مېعمار باش ھۊسای یەمەن
ئېڎ کەلارە کۊن گڵ و خاک و شەن٭
فېعلەن ئەساسەی تەحریرم نېیەن
پەی سەبتش ئایېر نە قەلبم شېیەن
نیگاش مەدارۇن تا دەرجش کەرۇن
هەر وەخت وەسیلەش وە دەس باوەرۇن
قاتی پاتی بۊ خاس چەنی خراو
تا بۊ وە شەربەت شەکەر چەنی ئاو
یادگارییەن پەی کەسێ مانۊ
شایەت درۇدێ پەیمان بکیانۊ
وەسیلەش فەوری حازر دېیاری
دەرج کەردم نە فەوق پەی یادگاری
ئېزهاری مەئیۊس کەم سەوادی وېت
بۍ عېلم و تەحسېل نامورادی وېت
کەردەبېت وە لام منیچ هەر بەو دەرد
جە کول کەس بەدتەر کەم فام و ڕەنگ زەرد
دمای پەنجا ساڵ ڕەنج و کەردەی وېم
ئیسە سابېتەن مەعلۇم بېیەن لېم
هەرچېوم کەردەن کول پەشیمانم
هەر یەک دەردېوەن نە ڕۇی زامانم
ئینە کول باعېس بېئېتلاعییەن
بېخەبەر نە چەرخ دنیای فانییەن
بۍ عېلم و سەواد جە نادانییەن
عاقڵ کەی کارش پەشیمانییەن
بازە با سۊچیۊ وەی داخ و وەی دەرد
جە هەردۇ دنیا مەحرۇم و دڵسەرد
بەڵام عەزیزم تەقسیرمان نېیەن
مەحەل موحەققەر تەنگ و وردییەن
مەدرەسەی علۇم عەقڵ و فام و بەخت
یا سایەی دیوار یا نە پای درەخت
فەیلەسۇفی عەقڵ کانی مەعریفەت
ڕەواج دەهەندەی عېلم و شەرېعەت
ئەو ڕۊ نیشانەی دەرد وە دەرمان بۍ
مەلا عەلی مراد، تەعلیم دەرمان بۍ
ئەو ئېمەش یاونا وەی پایەی بڵەند
شېخولئەزهر بۍ ئەو پیری پەڕ فەند
[1]