باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سی و حۆتەمە
ئەبوجەهل وېش یاونا لاو قوڕەیشیەکا، ماچۊ: محەمەد دنیاش ئاردېنە وە تەنگ، بە شەوڕەوی یاوان بەیتەلمەقدیس، چاگەیچۆ پەی حۆت تەبەقەو ئاسمانی. ئاڎیچۍ واتشان: با بلمۍ پەی لاو ئەبووبەکری، چەنی ئەبوجەهلی لوێ، ئەبووبەکر ماچۊ: مادام حەزرەتی واتەن، یانی ڕاسەن و ڕاسماچۊ، ئەی ئانە نېیەن جوبرەئیل بە یەک سات چن جارێ وەزۊرە سەر زەمین و مەگېڵۊوە ئاسمان.
چەنی سەنادید موشریکان یەکسەر
شین وە لای بووبەکر سیدیقی ئەکبەر
واتەن: محەمەد ساحیب کاری تۊ
وەیتەور فەرماوان دیسان هەم جە نۊ
ماچۊ موقەڕەب بارەگای ئەقدەس
من بەردەن وە سەر بەیتەلموقەددەس
یەعنی وەی حەرفە تۊ باوەڕداری
هەنی ئەو سادەق وە چەم مەداریی
ئەبووبەکر وات: ئینە چە داوان؟
ئەگەر ئەو واتەن ڕاسش فەرماوان
پەی چېش جوبرەئیل جە ساتی سەدئان
مەیۊ وە زەمین مەشۊ وە ئاسمان
جە پایەی بوڵند سەریری ئاڵا
ماوەرۊ پېخام ئەڵڵا تەعالا
پەی ئایە جوبریل دایېم ڕەهبەرەن
محەمەد جە ئەو موقەڕەبتەرەن
چونکە سیفاتش گرد هەر حەمیدەن
ئەر ئەو بواچۊ قەتران سفیدەن
قەوڵش سادیقەن فەرموودەش ڕاسەن
مەلایەک سروشت ئەشرەفنناسەن
ئەبوجەهل و قەوم وە دڵ پەرېشان
شەرمەندە و خجڵ شین وە جای وېشان
عەقیدەی بەعزێ جەودەم ئەو تەسدیق
ئەبووبەکرشان وانا وە سیدیق.[1]