باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجاهەمە
وەختێ دواڼزە نەفەرەکە یاوێوە مەدینە، ئیتر دەسشاکەرد بە کۊشش پەی یاونای ئیسلامی بە خەڵکی، یانە بە یانە، گېڵېنۍ، پېخامەکەی یاونېنۍ.
تا کەس بە تەعلیم فەرمانی عەزیم
بوانۊ پەی خەلق کەلامی قەدیم
ئەسڵی فەرعی دین پەرێ ڕوزگار
ئەحکاماتی شەرع فەرخندەی ئاسار
ڕوکنی مەزاهیب نیشان دۊ پېشان
بەربشان ئایین قەدیمی وېشان
مەسعەب جوانێ نەو ڕەسیدە بۍ
سەحابەی کرام پەسەندیدە بۍ
چن جەفا چەنی حەزرەت کېشابۍ
چن جە تانەی قەوم جەرگش ئېشابۍ
هەر قەدەر قورئان ئامابۍ بە وار
حیفزش کەردەبۍ بە وېنەی تومار
بە ئەمری حەزرەت ئەو دڵ گوزینە
شیی چەنی ئەنسار تا وە مەدینە
جە یانەی ئەسعەد ئیبنی زەرارە
پا ئاوەردەوە ئەو بەینەت دارە
ئەڕەدود مەکەرد جە یانەی ئەنسار
عاقڵانی قەوم مەکەردش بېدار
دەعوەت مەکەرد خەڵک بە دینی قەویم
وە ڕاگەی سیرات ڕاسی موستەقیم
یەکیەک وە حەرفش باوەڕ مەکەردەن
ئیمان بە خودا و حەزرەت ماوەردەن
تا یەک ڕۊ ئەسعەد ئیبنی زەرارە
هەم چەنی مەسعەب دیسان دووبارە
شین پەی مەحللە بن عەبدوڵلا ئەسهەل
قەومی بەنی ئەزفەر ئەکسەر تا ئەقەل
ئەو دوو تایەفەی شیرینی ئەنسار
جەم بین جەماجەم مەردانی نامدار
مەسعەب ڕووی خیتاب کەردش وە ئیشان
چن ئایەی قورئان وانا پەرێشان
ئەکسەر جەو مەجلیس ئیمانش ئاوەرد
گرد بە نبووەت حەزرەت باوەڕ کەرد.[1]