دەسەڵاتو حەیدەرسان (حەیدەر بەگو بەڵخەی) ، دمای خالیدسانی جە هۆرامانەنە.
وەختێ ساڵەو (1756ز) ی حەیدەربەگو بەڵخەی خالیدسانش کوشت، سڵېمان پاشاو بابانی دەسەڵاتو هۆرامانیش پەنە خەڵات کەرد، ماوەو شش مانگا فەرمانڕەواییش کەرد. پېسە خالیدسانی بی بە سان، ژەنەکۍ خالیدسانیش مارە کەردە، پیێکۍ خالیدسانیش ئاردۍ چېرو دەسەڵاتو وېش، حەمەزەمان بەگ کە ماموزاو خالیدسانی بۍ، واڵۍ حەیدەرسانی هامسەرەش بۍ، بییەبۍ بە گۊشدارو چېردەسەو حەیدەرسانی، بەڵام محەمەد بەگ براو خالیدسانی پەی هەل و دەرفەتێ گېڵۍ هەقەو براکەیش پسانۊ جە حەیدەرسانی، چەنی خزمەتکارە وەڵینەکا خالیدسانی یۊشاگېرت، پێمانشان بەست، دمای نانو وېرەگای، حەیدەرسان ڕوەو دیوەخان کەوت ڕا، عەلیلە نامێ، بە دەنگی بەرز ماچۊ مۊمێ باردۍ پەی سانی، تەشریف بەرۊ پەی دیوەخانی، هامڕێکېش ئەژنیشا، وېشا ئاماڎەکەردو مەڵاسشا گېرت، پېوەرە ڕوشنایی مومەکېشا دا وەرو گرۊڵیاو حەیدەرسانشا کوشت، چەنی حەیدەرسانی، داوڎ بەگی برایچشا کوشت، حەمەزەمان بەگ، زەماو حەیدەرسانی هیچش پەنە نەکریاو ڕوەو سنە ڕەما، چا وەختەنە محەمەد حەسەن خانو قاجاری فەرمانڕەواو والی سنەی بۍ، داواش وەنەکەرد دەسەڵاتو هۊرامانیش پەنە خەڵات کەرۊن، چیلایچۆ مسەفا بەگ کوڕو جەمشیدسانی جە لاو سڵېمان پاشاو بابانیۆ فرمانو دەسەڵاتداری هۆرامانیش دریابۍ پەنە، وەختێ یاوا هۆرامان چەنی ئانەی سوپێوە فرېش چەنیبۍ، بەڵام نەیاراش نیشتەجابۊ، حەمەزەمان بەگیچ کەنارش گېرت، ئیتر بەختەو ڕەزاسانی کۆتە توروقی، بەبۍ مانیای و ڕەنج کېشتەی و لواینە خزمەتو پاشایا، جە لاو سڵېمان پاشاو بابانیۆ خەڵاتو دەسەڵاتو هۆرامانیش دریا پەنە.[1]