پێش نیوەڕۆی ئەمڕۆ یەکشەممە #26-02-2023# لە بارەگای مەکتەبی سیاسی لە شاری #هەولێر#، #دەرباز کۆسرەت ڕەسوڵ# کارگێڕی مەکتەبی سیاسی #یەکێتیی نیشتمانیی کوردستان# بە ئامادەبوونی د. مەجید حەمەدەمین لێپرسراوی مەڵبەندی هەولێر، پێشوازی کرد لە پارێزەرانی خۆبەخشی گیراوانی #بادینان#.
لەمیانی پێشوازی کردنەکەدا دەرباز کۆسرەت ڕەسوڵ سوپاسی پارێزەرانی خۆبەخشی گیراوانی بادینانی کرد، کە لە ماوەکانی ڕابردوودا خۆبەخشانە داکۆکیان لەو گیراوانە کردووە و پاڵپشتی و پشتیوانی خۆشی بۆ دەربڕین، تەئکیدی کردەوە کە پێویستە لەم دۆسیەیەدا دادپەروەرانە مامەڵە بکرێت و مافەکانی مرۆڤ و ئازادی ڕادەربڕین پێشێل نەکرێن و بەزوویی کۆتایی بەم دۆسیەیە بهێنرێت.
لە کۆبوونەوەکەدا گفتوگۆ لەبارەی ئازادی ڕادەربڕین و کاری ڕۆژنامەنووسان، سەروەری یاسا و کارکردنی تیمە خۆبەخشەکانی پارێزەران لەپێناو خزمەتکردنی چین و توێژە جیاوازەکان کراو هەردوولا هاوڕا بوون کە پێویستە زەمینەی ئازادی ڕادەربڕین فراوانتر بکرێ و هیچ کەس لەسەر بیروڕای جیاواز سزا نەدرێت. [1]