باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و نۊهەمە
دیاری کەردەی ئەرکو بیلالی.
مزگی حەزرەتی ج
ە شارو مەدینەی بنیاڎنریا، ئیتر نماش چەنەکەرېنۍ، بەڵام موسوڵمانەکۍ کېشەو جەماعەتیشان بۍ، چونکم هەر باعزێشا وەختێنه ئېنۍ، پەی ڕېک ۋستەی نماو جەماعەتی، ئەسحابەکۍ هەریۊشان پەیلوێوەش بۍ، مەشوورەتشان کەرد، بەعزێشان واچېنۍ: پەی هاگاڎارکەردەیۆ موسوڵمانەکا دەفە بەکاربارمۍ، بەڵام حەزرەت ڕاش نەڎێ پەنە، فەرماواش دەف ژەنەی پا تەرزە کارو یەهوودیەن، بەعزێ تەرشان واتشان: بدەین وە ناقووس، حەزرەت فەرماواش: ناقووس پیشەو نەساران. دیسان بەعزێ تەرشان واتشان: وەڵۍ نمێنە ئایېرێ کەرمێ پەی هاگاڎار کەردەیۆ موسوڵمانەکا، بەڵام حەزرەت فەرماواش: ئایېرکەردەیۆ کاروو مەجووسەکان، ئەخیرجار عومەری فاروق وەرنیارش کەرد کە نەفەرێ بانگ بڎۊ، بلۊنە یاگێ بەرز هاوار کەرۊن کە واڎەی نمازەن، ئیتر حەزرەت پەیلواکەو عومەریش قبووڵکەرد، بیلالی حەبەشیش کیاست، بانگشدا.
بەڵۍ جە قودرەت کەس بە سەر نەزان
دنیا خاڵیی بی جە سەدای ئازان
سەحابان جە وەقت جومعەی جەماعەت
بەعزێ حازر بین ساعەت بە ساعەت
بەعزێ بە تەنیا تاعەت مەکەردەن
بېوەقت وە مەسجید تەشریف مەبەردەن
گرد هەر موحتاج بین پەی واڎەی تاعەت
بشان وە مەسجید سەحابەی کیرام
یەکسەر جە حوزوور شای خەیرەلئەنام
پەی ئیحرازی خەڵک مەشوورەت کەردەن
هەریەک خەیاڵێ نە دڵ ئاوەردەن
بەعزێ واتشان ئەر مەردوم کەم بۊ
با بدەین نە دەف تا یەکسەر جەم بۊ
حەزرەت فەرماوا: ئانە بېسوودەن
دەف زەدەن بەو نەوع شوبهەی یەهوودەن
بەعزێ واتشان بە وەندەی خرووس
جە واڎەی سەلات بدەین وە ناقووس
حەزرەت فەرماوا دیسان وە یاران
زاهیرەن ناقووس پیشەی نەساران
بەعزێ واتشان: هەر وەقت نماز کەین
بادا ئاتەشی عەزیم وە پا کەین
حەزرەت فەرماوا: دڵ هەم مەحبووسەن
ئاتەش قاعیدەی ئەهلی مەجووسەن
تا ئاخر ئەمیر فاروقی ئەعزەم
بەتاڵ تەدبیر یاران گرد وە هەم
عەرز کەرد فیدات بام یا ڕەسولەڵڵا
شەخسێ مەعلووم کەر وە ئیزنی ئەڵڵا
بشۊ وە بەرزی بوڵند وە ئاواز
واچۊن: الصلاة هەی واڎەی نماز
حەزرەت جە تەدبیر یاران فەرد فەرد
هەر قەولی فارووق ئەعزەم پەسەند کەرد
بیلالی حەبەش تەڵەب کەرد دەر زات
فەرما: ئەی ڕەفیق یاری خوش سیفات
بە ئیزنی مەعبوود دەهەندەی داوەر
تۊ بشۊ وە بان بوڵندی مینبەر
وە ئاوازی بەرز جە ڕووی کائینات
هەر یەک ڕوژ پەنج جار واچە (الصلاة).[1]