باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و یاڼزەهەمە

یۊ جە ئەسحابەکا وەرمێ وەشش دی، کە تەعلیماتو بانگیش دریا پەنە، ئاڎ جە وەرمەکەشەنە، بانگش ئەژنی، لوانە مەژگ و دڵش، دمای بېدار بیێش، یەکسەر لوانە خزمەتو حەزرەتی و پەیش گېڵناوە. ئانەی یاگۍ مدرایەن، هەرچوار وەشەویسەکەو حەزرەتی، چوار خەلیفەکەو دمای وېش، عەینو وەرمیشا دییەبۍ، پەوکەی حەزرەت فەرمانش بە بیلالی حەبەشی کەرد، کە سەداو (اللە اکبر) ی بەرزکەرۊوە.
هەروەقت بدەین لېش بۍ زیاد و کەم
یاران پەی سەلات یەکسەر مەبان جەم
زومرەی ئەسحابان ساعەت بە ساعەت
حازر بان جە وەقت جومعە و جەماعەت
ئەو شەخسە واتش: من چېوێ جە نۊ
جە ناقووس خاستەر بواچوون وە تۊ
بە نامۍ ئەکبەر کەریمی کارساز
جەمعی کەلیمات ئازان بە ئاواز
تەعلیم کەرد پەنەش چوون دەرسی ئوستاد
خاس ڕەوان کەرد پېش تاکو نەشۊش جە یاد
ناگاە عەبدوڵڵا جە خاوی شیرین
بېدار بیی بە ئەمر بینای بېهتەرین
دیش ئەو ڕویا گرد وە ڕوز ئاوەردش
نەقشەن نە ڕووی دڵ پاکی بۍ گەردش
کەس جە مەتڵەب نەکەرد با خەبەر
تا شیی وە مەجلیس شای خەیرولبەشەر
عەرزکەرد واقیعەی ڕویای وېش تەمام
وانا بە حزوور شای خەیرەلئەنام
جەو تەرەف بووبەکر سیدیقی ئەکبەر
مەحرەم وە ئەسرار ڕازی پېغەممەر
واتش: بە خودای کەعبەی موعەززەم
منیچ هەم ئېشەو وەیتەور دیم وە چەم
ئەمیری عادل فارووقی سالار
عەرزکەرد نە خزمەت شای بوراق سوار
وات: منیچ ئېمشەو بەو تەور دیم وە چەم
ڕویای عەبدوڵڵا بۍ زیاد و کەم
ئەمیری فازڵ ئەڵماسی کانی
جامع الاوراق وەحی ڕەببانی
شەمعی شەهیدان شای ڕوشەن زەین
کانی حەیا و عیلم، یانی زیڼوورەین
وات: بە خودا ئەمنیچ ئېشەو جە ناکاو
ڕویای عەبدوڵڵا یەکسەر دیم نە خاو
چوارەمین ئەمیر شای دڵدڵ سوار
شېر ئیبنی عەم موستەفای موختار
وات: من هەم ڕویای عەبدوڵڵا تەمام
ئېشەو دیم وە چەم وە ئایەی کەلام
قەولی جوبرەئیل تەشریفش ئاوەرد
حەزرەت جە ئازان بەو تەور ئیعلام کەرد
جەو دما حەزرەت موستەفاو یاران
قەرار دان ئازان پەی ڕوزگاران
بە ئەمری خوداوەند ئیزنی پېغەممەر
بیلال شیی وە بان بوڵندی مینبەر
هورکېشا سەدای اللە اکبەر
وانا حەمدی زات دانای دادگەر
جە هەژدە فرسەنگ سەدای ئەو وېیەرد
کلېسا و کەنیشت یەکسەر خاپوور کەرد.[1]