باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و ویس و یەکەمە
سەلمانی فارسی کوڕێ تازە یاواپەنە، گورجوگوڵ، تازە ڕەسیدە، تاتەش کابرێوە ئایېر پەرەس، دوڵەمەن، جە ئاتەشخانەنە سەلمانی نیېرە پەی خېزنای ئایېرەکەی، هەرگیز نازۍ بەری وینۊ، بەڵام ڕوێشا بە ناچاری سەلمانش کیاست پەی دلۍ باخو خورماوەکاش.
جە بارەو سەلمانی فارسیوە:
بەڵۍ ڕیوایەت ڕاوی گرد ڕاسەن
خوسووسەن فەرموودەی ئیبنی عەبباسەن
سەلمان تیفلێ بۍ تازە ڕەسیدە
تاڵی و تووشی وەزع دنیا نەدیدە
فەرزەندی یەک شەخس عەبووس مەست بۍ
شەخسێ دوڵەمەڼ ئاتەش پەرست بۍ
سەلمان دایېم دوور هەر درەخشان بۍ
ئیسمی پدەرش نوورەفشان بۍ
جاە شەریک قەریەی ئاوە عەیان بۍ
یەک ساعەت قەریب وە ئەسفەهان بۍ
چوون شەخسی مونعیم دەروون بۍ ئاخ بۍ
ساحیب مەزرەعە و بستان و باغ بۍ
دایېم وېش مەشیی بە شاڎیی مەزاق
پەی سەرپەرەشتی مەزرەعەی ئەرزاق
قەرارش دابۍ وە بۍ چەند و چوون
سەلمان جەیانە نەشۊ وە بېروون
شەوان تا وە ڕۊ نە تۊی کاشانە
خزمەت گوزار بۊ وە ئاتەشخانە
هەر سوبح تا ئېوار مەسوزۊ ئایېر
بڵېسەش مەشۊ باهیر وە باهیر
وېنەی خادمان خزمەت مەکەردش
دایېم وە ئاتەش سوجدە مەبەردش
مەواتش: خدمەت دین مەکەردش
تا یەک ڕۊ بابۊش فەرما: ئەی فەرزەند
نووری دیڎەی من عەزیزی دڵبەند
ئارۊ وە تاجیل تۊ بشۊ وە بەر
مەزرەعەی خورمان سەرپەرشت کەر
بەڵام دەخیلم زوو بکەر دەعوەت
بۍ دېر ئامانەت پەی من بۊ زەحمەت.[1]