ناونیشانی بابەت: سلێمانی: زانکۆیەکی ژاپۆنی کاری کنە و پشکنین لە گردی یاسین تەپە دەکات
ئامادەکردنی: #هەڵمەت بتوێنی#
بەڕێوەبەری گشتیی شوێنەوار و کەلەپوور لە #وەزارەتی شارەوانی و گەشتوگوزار#ی هەرێمی کوردستان ڕایگەیاند، گرێبەستێکی چوار ساڵەیان لەگەڵ زانکۆیەکی ژاپۆنی کردووە، بۆ ئەنجامدانی کاری کنە و پشکنن لە گردی یاسین تەپەی سنووری پارێزگای #سلێمانی#.
کەیفی مستەفا، بەڕێوەبەری گشتیی شوێنەوار و کەلەپوور بە (باسکورد) ی ڕاگەیاند: لەگەڵ زانکۆی چوبوی CHBUی یابانی، گرێبەستێکی شوێنەواریی ماوە چوار ساڵیمان واژۆ کردووە، کە ناوەرۆکەکەی شیکاری و هەڵکۆڵینە لە گردی یاسین تەپە، لە سنووری شارەزووری پارێزگای سلێمانی.
وتیشی: ئەو تیمە لەو ماوەیەدا بەوردی کاری کنە و پشکنین و هەڵکۆڵین و دەرخستنی مێژوو و پارچە شوێنەوارییەکانی گردەکە ئەنجام دەدەن و دەرفەتی کاریش بۆ ژمارەیەک دەرچووی شوێنەوار دەڕەخسێنن.
جێی ئاماژەپێدانە، پێشووتر کاری کنە و پشکنینی ئەو گردە کراوە، بەڵام بەهۆی قەیرانی دارایی و کۆرۆنا وەستاوە و دوای ئەو ڕێککەوتن و گرێبەستەیە، دەست پێ دەکاتەوە.
بەپێی لێکۆڵینەوە مێژووییەکان، گردی شوێنەواری یاسین تەپە تەمەنی بۆ زیاتر لە 2 هەزار ساڵ پێش زایین دەگەڕێتەوە، پێشتر بۆ چەند ساڵێک تیمێکی یابانی، لوبنانی، کوردی کاری کنە و پشکنینیان لەم شوێنەوارەدا کردووە، پاشماوەی کۆشکێکی کۆنیان تێدا دۆزیوەتەوە، کە مێژووی بۆ گەلە دێرینەکانی ئەوکات دەگەڕێتەوە، کە پێدەچێت بۆ سەردەمی لوولووبییەکان بگەڕێتەوە.[1]