تارېخو ئەدەبیاتو یارسانی
بەشۍ ویسەمە.
(بەشۍ یەرەمە)
جە وېما جە وېم، جە وېما جە وېم
دەرد و دەرمانم، جە وېما جە وېم
لوام وە ملە و دەست بەردم وە نېم
دیم تیری باران کەفتەن ئەو دلېم
ماناش:
دەردە و دەرمانم ئینا دلۍ وېمەنە، لوانۍ سەرو تەپێوە و دەسم بەرد پەی (نێم) ی، دیم کە تیر واران کریەو.
چی دوە بەیتەنە بابا ناوس باس جە تۊبەکەردەی کەرۊن، پاسە بەرمەگنۊ کە هەس بە تاوانی کەرۊن، خوڎا تیر ۋارانش کەرۊن، دڵش مەپېکۊ، پینەیە دڵش جە گوناحا پاک مەبۊوە.
(بەشۍ چوارەمە)
جە وېم پەنهانا، جە وېم پەنهانا
تیرێ وەم کەفتەن، جە وېم پەنهانا
تیر جە گەوهەرا، گەوهەر جە کانا
تا نەخی مێردان، بڎۊ بېستانا
ماناش:
تیرێ پەنهانییە
زامڎارش کەردا، تیرێ پەنهانییە
تیرە جە گۆهەریەنە، گۆهەریچ جە کانییەن،
پەی ئانەی تاقمو مەردا بیاوا بە بېستانی.
بابا ناوس خەریکەن ڕا نیشانە مڎۊن، ئینا چا باوەڕەنە کە ئېش و ناڕەحەتی، مروڤی جە گوناحا پاک کەراوە، تیرەی خوڎاییە کە دڵو ئاڎەمیزادی مەپېکۊ و پاکش کەرۊوە، ئا تیرۍ جە گۆهەرێ یەکانەینە جە کانو خوڎاینە، یانی هەمیشەییەنە، ئیتر بە پاک بېیەی گوناحاشا پیێ میاوا باخو سوزی خوڎایی.
(بەشۍ پەنجەمە)
ئەز ناوسەنان، مەیۊنان جە سەر
تېخی دوە دەمم، نیان نە کەمەر
جە سینەم مەگنۊ، مرواری و گەوهەر
زات ئاسوارانان، چەنی شا حەیدەر
ماناش:
من ناوسەنا، یاگێ بەرزۆ مەونە
شمشېری دوە دەمەنا، زولفەقارم ئینا کەمەرەنە
سینەمەنە مرواریۍ و گۆهەر پەنهانېنۍ
من و شا حەیدەر (عەلی) جە یەک دانە گۆهەرینمۍ.
چی دوە بەیتەنە، شاعېر گەرەکشەن ئانەیە نیشان بڎۊ کە گیانێ ئامانەنە دلۍ لاشەیش، هەردوېشان جە یەک دانە گۆهەرینۍ، دیارەن جە ئاسمانۆ وەستەنەرە، یانی گیانو خوڎایەن، شمشېرو زولفەقاری (عەلی) ئینا کەمەرشەنە.
(بەشۍ ششەمە)
جە بېباوەڕی، جە بېباوەڕی
خەریک مەندەنان، جە بېباوەڕی
تۊ وېت بشناسا و بکەر داوەری
ئیتر چوون باوەڕ، وە مەرگ ماوەری
شاعېر زەریف و ساکارانە ئانەیە بەرمەوزۊن کە هەر کەسێ وېش بشناسۊن ئیتر چەنی باوەڕ بە خراپەی کەرۊن.
(بەشۍ حۆتەمە)
جە سەرا و سەرێ، جە بان و مامێ
چەنی کۊڵدەر و گوم کەردە ڕاهێ
شین شین وە مېهمان، یەک شان و شاهێ
فەرقمان نابێ نە ڕووی تەختگاهێ.
ماناش:
یاگێ بەرزو کەشێنە کە بارەگاو خوڎایەن
ڕامان جە عابیدی گومە کەردېنە
لوایمۍ مېمانداری سوڵتان و شایێ
هیچ جیاوازیێ مېیانمانە نەبۍ.
بابا ناوس جە فرەو شېعرەکاشەنە خەریکو ئاسمانی و یاگۍ بەرزییەن، چونکم وېش بە گیانو پەروەدگاری مەزانۊ، هەر کەسێ شۊنەو ڕاسیرە بگېڵۊن، بېگومان مەیاوۊن بە بارەگاو سوڵتانی و شاها و گرد یارسانەکۍ دلۍ گۆهەرو یەکانەینە مەتاویاوە (یەکیەتی بېیەی) .
(بەشۍ حۆتەمە)
جەزا و سەری، جە کۊ و دەشتی
جە دلۍ باخی، وېنەی بەهەشتی
جەم بیم مەگیلیام، پەی بەخت نەشتی
تا بیم وە هامدەم زیوا سرشتی
ماناش:
چېگەنە شاعېر پەنجۍ پەی داستانو جەمشیدو جەمی پیشدادی درېژ کەرۊن، پېسە چەنی جەمشید بە کناچۍ گەوڕەنگی شاو زابلستانی شاڎ بی، بابا ناوسیچ بە (زیبا سرشتی) شاڎ بۊن[1].