شیرین بای شیرین، شیرینیت یاوا.
دیارەن وەشەویسێ میرزا ئۆلقاڎری سەوقاتیێ شیرینش پەی کیاستەن، ئیتر گەر نامێوە موشکیندارە، یان گەزۊ و شیرینییەن، ئانە پەی تاڵی دەهانو میرزای، یان تاڵی خەمانیش دەرمانەن.
ئانەی جە لاو میرزایۆ بە قیمەتەن، تەنیا سەوقاتییەکە نېیەن، یام شیرینیەکە نیەن، بەڵکم بکیانەن، کە شیرین ئاسا، فەرهادش وە یاڎ ئاوەردەن، لەیلای عامیریەن، مەجنوونش شیرین کەردەن.
تاڵاوەو دووری ئازیزی تەنیا بە سەوقاتیێ شیرین نمەدریۊ بە باڎ، مەشۊم زەڕڕێ جە شەربەتەو لەبانی لاڵش، قەترەیێ جە عارەقو کوڵمانی ئاڵش، تایێ جە زوڵفانو سیای ئەشەد بۊش، بکیانو پەرېش، تاکو تاڵاوەو دڵیش بڎۊ وە تاڵان.

قیبلەم نمانای
قیبلەم نمانای قیبلەم نمانای
ئارۊ وېت ئاسا کەرەم نمانای
وېنەی حاڵزانان وە حاڵم زانای
دەست عەتا و مەیل مەرحەمەت شانای
تەسدیعت کېشان خەیلێ ماڵئاوا
شیرین بای شیرین، شرینیت یاوا
مەعلوومەن چوون وېت شیرین چارەنی
شای لەنجە شرین ساحیب لارەنی
هەرکەسێ چوون تۊ شۊخ دوڵبەر بۊ
مەبۊ سەوقاتش گەزۊ و شەکەر بۊ
شیرین شیرینی جە شېوەی وېشەن
شیرینی شیرین شای ئەرمەن پېشەن
شیرین فەرهادت وە یاڎ ئاوەردەن
لەیلۍ مەجنوونت سەرئەفراز کەردەن
نەمام نەوبەر نه و تووڵ ساوا
شیرین بای شیرین شیرینیت یاوا
من خۊ تاڵی تاڵ تاڵ وەردەی تاڵم
تاڵاو بەردەی زاخ سفتەی زوخاڵم
ئەوەند سەفرار دەرد هیجر تۊم سازان
ماوام پەژارەن چوون ماران‌گازان
چوون تاڵاو خەم تام تاڵ نۊشم
جە دیک تاڵی خەم دریان جۊشم
ئەگەر ئیفلاتوون، لوقمان حاڵان
وە شیرەی شەربەت حەڵقم بماڵان
هەر تاڵتەر مەبۊ دڵ جە مداوا
شیرین بای شیرین شیرینیت یاوا
شەوان هامڕازم هەر ئاهوناڵەن
تام دەهانم وېنەی قرژاڵەن
عومرم فانیەن ئەوقاتم تاڵەن
جە تاڵاو دەرد حاڵەم بەدحاڵەن
یەند ژەنگ مەینەت تاڵیم ئاوەردەن
هونم جە دیڎەی عالەم تاڵ کەردەن
جە تام تاڵی تاڵاوی تاڵەم
وە گیانت ئازیز تۊقیان زاڵەم
واچوون پەنجەش وە مەیلت ناوا
شیرین بای شیرین شیرینیت یاوا
قیبلەم ئەر چێوەر وە نەزان‌حاڵی
دابۊت چەنیمان ژەمێ وە تاڵی
هیچ مەنات نیەن زامت ناوەردەن
شیرینی عەشقت لەبچەش نەکەردەن
جەلای مەشاقان نەکەردەنت مەشق
نەنۊشانت گەرم زەڕەی حەڵوای عەشق
یەقین جە دەوران فارغ جە دەردی
پەوکی یاونای مەوبەت وە سەردی
عادەت هەر سوڵحەن جە دمای داوا
شیرین بای شیرین شیرینیت یاوا
کۍ گۊش دۊ وە سۊز ئه و ئاه سەردم
ناپەیدان دەرمان دەوا پەی دەردم
مەر زەڕەی شەربەت لېو لاڵ تۊ
بەعزێ جه و گوڵاو گۊنای ئاڵ تۊ
تایە جه و زوڵفان سیای ئەشەدبۊ
قەترەی جه و عەرەق بەین دوو لیمۊ
بکیانی پەرېم شای سۊسەن خاڵان
بەڵکە تاڵی دڵ بڎۊ وە تاڵان
وەرنە وە گیانت وە سەد نەیشەکەر
تاڵی دەروونم نمەشۊ وە بەر
بە وېنەی ئەڵماس جەرگم شکاوا
شیرین بای شیرین شیرینیت یاوا
دەوڵەتت زیاڎ، سایەت نەبۊ کەم
شای وەفاداران شەرت و شۊن موحکەم
ڕاسەن من مەجنوون دېوانەی هەردم
مەدهۊش و کەم فام شېویای دەردم
بەڵام مەزانوو یە ئەمراریەن
شیرینی مایەی وەفاداریەن
دەروونت جە شەوق بادەی حوب کەیلەن
مەعنای شیرینت قەرینەی مەیلەن
دڵ نۊشاونۊش کەرد هەتاکە تاوا
شیرین بای شیرین شیرینیت یاوا
جەی دما دەخیل پەی پەی پەیاپەی
جۊی شیرینی مەیل هۊرکەرە بابەی
پەخشان بۊ وەبان کولبەند دڵ‌دا
تاڵی سەفرای خەم بەرۊ وە گڵدا
تا ماڵات عەشق شاری کۊرەی فەرد
نەنۊشۊ هەنی جۊی تاڵاو دەرد
چوون شیرین شېوە شیرین جە ماڵی
یاشا جە دەوران نەوینی تاڵی
سەڎجار ئافەرین هەر ئەحسەنت لەیل
با زیاتەر بۊ جۊ ی شیرینی مەیل
پەی کۍ پەی (قاڎر) کۊ دووجەیل ماوا
شیرین بای شیرین شیرینیت یاوا.[1]