چناری هەوڵی
بەشۊ هەشتەمۍ
دار چنارو هەوڵی، باس جە ساتەکا ژیوای گەنجیش، جەتەمەنو نەوتول نەمامیش کەرۊن، چەنی دلۍ باخچێوەنە عومرش گوزەرنان، خەڵکی ئامێنۍ تەماشەشا کەردەن،دڵشا شییەن ۋەنە پەی(دەسەو بېڵۍ)، چونکم قامەتش باریک و ڕېک بییەن، جە ناگا کابرێوە فەرهاد ئاسا بە قوڵەنگێوە وەردەمشنە مدران، قوڵنگەش مەشاناو بېخش پېکانی، ڕیشەو ژیوایش بەرئاردا، هۊرش کېشتاو نیانېش سەرو شانەیشۆ، ئاردانېش پەی(هەوڵۍ)، ئەچېگە ڕیشەش پۊژنانېرە، تا ساڵێ هەر غەریبیم کەرد، خەفەتم وارد، بەڵام دماتەر ڕیشەم ئاوەو هەوڵیش واردۆ، بیە بە شیفا پەی زامان سەختم، گۊشم دا وە شنۊی شەماڵ شاوە، هۊشم نیم نیگای نازاری پاوە، سەرتاپام ساکن بی جە دەرد، گەز گەز باڵام مەکەرد.
میرزام نەواچی عومرم کەم نیەن
چن وەشی و شاڎییم جە دەس بەرشیەن
ئەو وەختە باڵام نەوتوڵ نەمام بۍ
هەم زەنجیر عەشق پاوەند پام بۍ
ئەرکەسێ ماما جە ناکا مەویەرد
تېر سەیر باڵای ئاڵای من مەکەرد
مەوات ئەی نەمام بڎیە چن ڕاسەن
بەخوڎا پەی دەستەی بېڵی من خاسەن
من هەم فەراوان خۊف نە دڵ بەردم
واتم مەکەران هەناسە سەردم
ڕۊیە ناغافڵ دیم خاڵۊ ئاغە
ئەو نۊبەر نەمام شیرین دەماغە
ئەویچ وېنەی من ئەوەڵ تافش بۍ
جۊش کوورە عەشق سینە سافش بۍ
قوڵەنگێ چەنی وېش ئاوردەبۍ
قەست جابەجا منش کەردەبۍ
چوون فەرهاد نە پای قولەی بېستوون
شانا وە بېخم وە بۍ چەند و چوون
تا ڕیشەم جە خاک ئاوەردش وە بەر
ڕۊی ڕۊشن جەلام، بی وە ڕۊی مەحشەر
نامەی نامەڎییم دریا دەستەوە
هەر ئېدم زانا هاژەم بەستەوە
بەو گشت زووخ و زام خەتەرناکەوە
وە بۍ هۊش کەفتم، وە ڕووی خاکەوە
ئاغە لاشەی من گرت وە شانەوە
من هۆردام ئەفغان وە گریانەوە
واتم گەردەنم حەراڵ کەن یاران
دۊسان ڕەفیقان داران چناران
خولاسەی کەلام، ئاغە من ئاوەرد
ئەوڕۊ تا هەوڵی مودارا نەکەرد
ئەوەڵ ئیسم زات پاک حەق بەردش
نەی جاگەی چاڵێ پەی ڕیشەم کەندش
من نیا نە خاک هەر بەو ئېشەوە
بەو ئېش دووری قەوم و خوېشەوە
تا ساڵێ ڕیشەم هەر زووخ مەشانا
یەیاپەی پەی وېم لاحەولەم وانا
ئاخر تا بەرشی ئەو سەودای خامم
ئاوی هەوڵی بی، وە شەفای زامم
کەم کەم تا کەمێ هۊشم ئاماوە
دیسان هەم شاتوڵ باڵام ڕاماوە
گۊشدام وە شنۊی شەماڵ شاوە
هۊش وە نیم نیگای ڕەندان پاوە
دڵ وە نەزاکەت مەحبووب جافان
خەیاڵ وە لەنجەی عەنبەر کەڵافان
میرزام سەرتاپام ساکن بی جە دەرد
قوربان جە شاڎیی گەزگەز باڵام کەرد
جە ئیشارەی عەین ئەبرۊی نازاران
عیشوە و کریشمەی لای شەدەلاران
بۊی بەیان کاڵ عەتر میخەک بەند
تۊی یەخەی کەتان گرجی دڵ پەسەند
مەیل نازاران بەردەبیۍ هۊشم
چمان جبرەئیل مەکېشا گۊشم.[1]