بنەچەو بەگزاڎەکا هۆرامانی
بەشۊ دەهەمۍ
حسێن سان:
دمای ئانەی دۆڵەتی عوسمانی فەرمانو سانیەتی هۆرامانو لهونیشان پەی (حسێن سان) ی بەرکەرد، پەی وەرگېرتەی جە زیاڎبیەو دەسەڵاتو عوسامانیەکا جە حوکومڕانی هۆرامانینە، (سوبحان وێردی خانی ئەردەڵانی) جە خولو چوارەمو حوکومڕانیەکەیشەنە، مېیانو ساڵەکا (1158-1169ک _ 1745-1747ز) ، فەرمانو حوکمڕانی لهونیش پەی (حسێن سان) ی و فەرمانو حوکمڕانی (ڕەزاو) یش پەی (خەسرەو بەگو کوڕو بارام سانو دوەمی) بەرکەرد، (حسێن سان) دۊسایەتیێ پتەوش چەنی عوسمانییەکا بۍ، هەر بە فیتو ئاڎییشاچ هۆڵېش دێنۍ حوکمڕانی گردو هۆرامانی ۋزۊنە چېرو دەسەڵاتو وېش، پەی یاوای بە مەرامەکەیش، (پیلانەو کوشتەو (خەسرەو بەگ) یش متېنەرەو سەرو خوانو مېمانداریۆ ساڵەو (1160ک/ 1747ز) بە خەنجەرە کوشتەنش، دمای یاوای هەواڵەکەی لاو (بارام سانو دوەمی) ، ئاڎییچ پەی ئەسای هەقەو کوڕەکەیش، وېش ئاماڎەکەردەن، پەی هەمان مەبەسی (خالد بەگو براو خەسرەو بەگی) پرێنە هەڵمەتێش بەردېنە سەرو (مۇمن خان بەگو مسەفا بەگی) کە هەردوېشا برێ (حسێن سانی) بیېنۍ، شیرین ۋەرمەنە هەردوېش کوشتېنۍ، حسێن سانیچ دەگاو (هانەگەرمڵە) یۆ ڕوەو دەگاو (نەوسووڎ) ۍ ڕەمان، چاگەیچۆ لوان پەی (سنە) ی، چاگە داواو کۊمەکیش جە (سوبحان وێردی خانو والی) کەردېنە، والی سنەیچ پەنەش واتەن مەشۊم تا وەهارۍ ماتڵ کەرۊن، وەهارو ساڵەو (1161ک/ 1748ز) سوبحان وێردی خان، فەوجەو کوردەسانی و چن فەرماندێ سەربازیۍ چانېشا (محەمەد عەلی سوڵتان، مورتەزا قولی بەگ) ش وستېنۍ چېرو فەرمانداری (حسێن سانی) .چیسەریچۆ (بارام سانی دوەم) داواو کۊمەکیش جە پاشاو بابانی کەردەبۍ، دمای ڕەزامەندیش، بە سوپێوە گۆرېۋە ۋەراۋەرو حسێن سانیۆ مدرا، دمای جەنگێ سەختی، هەر دوە لەشکرەکە گرۊلیېشا پەنە نەمەنۍ، دەسشا دا یەخۍ یۊترینی، بە شمشېر کۆتۍ گیانو یۊی، چا دەسەو یەخەنە، (حسێن سان و بارام سانی دوەم) یۊگیرۍ بیۍ، حسێن سان کوشیا، دمای ئا جەنگەیە، پەی یەکجاری حوکمڕانی (لهون و ڕەزاوی) بە یەکپارچەیی ئامانە چېرو دەسەڵاتو (بارام سانی دوەمی) .
درېژەو دەسەڵاتەکەیشەنە هەرگیز دۊسایەتیش چەنی دەسەڵاتدارا بابانی و عوسمانیەکا نەکەردەنو گۊشش نەڎێنۍ پەنە.[1]