واتەو گۊشگېرتەی مېیانو ئاسمانی و زەمینی
بەشۊ نۊهەمۍ
ئاسمان جە نۊ ئاماوە جواب، واتش: ئەی زەمین، تۊ دایېم ئینای چېرو سایەو منەنە، من بەهەشتم هەن، تۊ جەحەڼەم، ئەی زەمین من جە زاتو هەقیۆ نزیکەنا، یەدو قودرەتی ئاراستەم کەرۊن، پېسە تۊ گوناحېم سەرۆ نمەکریا، سەربەرزو ڕۊ قیامەتینا، ئاخر پەنەم واچە چەنی تۊ هامشانو من مدری، ئی دەمدرازیېتە نیشانۍ بېعاریتەنی، دیارەن فرە ناحاڵینی جە ۋېت.
ئاسمان جە نۊ ئاما وە ئاواز
واتش هەی زەمین بەڎهەوای ناساز
من (مەعمورەی)ی موڵک شاهەنشای حەققم
جای لیقای شەریف فەرد موتڵەقم
لەتیفتەر جە ئاو، لەتیف و سافم
بۍ پەی، بۍ ستوون پەردە و تەنافم
گەنجینەی نایاب دانای بۍ عەیبم
مەعدەن ئەسرار خەزانەی غەیبم
ئاراستەی کەرەم یەد قودرەتم
قورب تەجەلای زات وەحدەتم
بۍ گونا و تەقسیر بیۍ مەڵامەتم
سەربەرز دیوان ڕۊی قیامەتم
قوببەی بارەگام جە عەرش ۋیەردەن
دایېم هەر وە خاک سوحبەتم کەردەن
زەمین نیگا کەر، تۊ چن بېنووری؟
چن جە فەزڵ پاک خوڎاوەند دووری
زەمین جە لای حەق من بوڵەند پایەم
زەمین تۊ دایېم هەر های نە سایەم
من بە هەشتم هەن تۊ دۊزەخ داری
ئەر نەکەی سکووت خەیلێ بېعاری
کەسێ کە دایېم دووی دۊزەخ پېش بۊ
توخوڎا سا مەشیۊ فەزڵ ئه و چېش بۊ؟!
ئاخر هەی زەمین خاک سیای سەرد
چۊن بیت وە ڕەفیق چەرخ لاجیوەرد؟
حاڵیبەر جە ۋېت وە یەک ئیشارە
جوابت چېشەن پەنهان مەدارە؟[1]