Navê pirtûkê: “AŞIQÊ EŞQÊ”: DENGBÊJ Û SAZBEND XALIDÊ XENDEQA (Cumhuriyetin 100. yılında Ergani DİN-EĞİTİM-KÜLTÜR)
Navê nivîskar: Oktay BOZAN, Abdusselam ERTEKİN,Abdullah CENGİZ,Asım KAÇMAZ
Cihê çapkirina pirtûkê: Bursa
Navê çapxaneyê: Weşanxaneya Ekîn
Sala çapê: 2023

Destpêk
Di nêrîta devkî ya kurdî de hunera dengbêjiyê, bi taybetmendiyên xweser ên guherbar, bi kapasiteya xwe ya hilberîner û bi vegêrana xwe ya estetîk ji qadên cihêreng ên vekolînê re derfetan pêşkêş dike. Dengbêj bi performansên hunerî yên devkî, bi perwerdehî, serhatî, şagirt-hoste û têkiliyên xwe yên civakî ve divê di navenda xebatên li ser vê hunerê de cih bigirin. Di pêwendeke berfireh a civakî û dîrokî de, jiyan û serhatiyên dengbêj û têkiliyên wan ên bi cimaeta guhdar û dengbêjên din re derfetê dide ku meriv bi kûrahî li ser vê nêrîtê bifikire û dînamîkên lokal ên takekesî derbixe holê. Çawa ku dem, zeman, mekan û pêwend ji bo nirxandina berhem û performansên dengbêjan xwedî roleke muhim in, alavên ji bo îcrakirin û qeydkirinê tên bikaranîn û rewşa sosyo-polîtîk a demê jî hêjayê nirxandinê ne. [1]