پیرەکۍ هۆرامانی
بەشۊ یەکەمۍ
چن سەرچەمۍنە باس جە پیرەکا هۆرامانی کریان، قسەوباسشان سەر کریان، چېگەنە ئیشارە مەکەرمۍ بە نویستەی ئا نویسەرا و سەرچەمەکا:
ماموسای کوچکەردە (محەمەد بەهائەدین مەڵڵا ساحیب) ئەشناسیا بە (دانای هۆرامی) جە کتېبچەو پیرشالیاری زەردەشتینە نویستەنش: پەرسای (هورمزد) ی تەنیا سەرو پیا ئایینیە بەنامبانگەکا بېیەن کە پەنەشان واتېنۍ (پیر) ، ئا پیرېچە فرېنۍ و پېسە واتەنشا (99) پیرۍ هۆرامانی.
ماموسا (صدیق بورەکەیی) جە کتېبو (تارېخوی وېژەی کوردی-بەرگی یەکەم) نامۍ ژمارێ جە پیرەکا هۆرامان و شاهۊیش ئاردېنە و بەشێ جە ژیواینامە و ئا شېعرۍ کە واتېنېشا وستېنېش ڕوە، عەینو سەرچەمەینەو جە باسو (سان سەهاکی بەرزنجی) ینە باسش چانەیە کەردەن کە (72) پیرۍ و (99) پیرۍ شاهوی گردشان یارۍ و لایەنگرۍ سوڵتان سەهاکی بیېنۍ و پیرۍ ڕاوڕەچەو (یارسان-کاکەیی) بیېنۍ.
موزەفەر خانو ڕەزاوی جە دەسنوېس (پاسداران مرز ایران-تاریخ اورامان) کە بە زوانی فارسی نویسیان، ماچۊ: مەگېڵناوە (99) پیرۍ جە هۆرامان بیېنۍ، کە دنیاشا وستېنە لاوە سەرتاپاو ژیوایشان پەی خوڎاپەرەسی خەرج کەردەن، ئا پیرۍ بە زوانی هۆرامی کۊن واتەو واچشان کەردەن، پەنەش واچیان (ماریفەت) .
ماموسا (محەمەد ئەمین هۆرامانی) جە تارېخوو هۆرامانینە نویستەنش: دەنگوباس چامنەن کە (99) پیرۍ جە هۆرامان بیېنۍ و باعزێشا هەر جە کۊنۆ بیېنۍ، بەعزێچشا سەردەمو سانە کۊنەکا هۆرامانینە ژیوێنۍ، بە نیازو پاککەردەیۆ ڕوحیشا هەر دەم خەریکو چلە کېشتەی بیېنۍ.[1]