دەسەڵاتدار هەرچوومنە بۊ، زاڵم، ستەمکار، گەڼەڵ، هۊکاری ئەساسی و یارمەتی دەرش، گېلی و خرابی میللەتیەن، گەر خەڵک زوڵم قبووڵ نەکەرۊ، زاڵم چېشش پەنە کریۊ. مەگېڵناوە:
هەر بی بەشاو جەنگەڵی!
هەر زۊرش کەرد ئەو حێوانا کە سەعات ششو ساعبی هۊربېزا و ششو وېرەگای بووسا!
وەختارێچ واردەشا بەش کەرد، دەسورش دا هیچ چوار پا و پەلەوەر و جانەوەرێوە شش تیکۍ فرەتەر نەوەرۊ.
عانێچ گەمە کەرا مەشۊم هەر تاقمێوە شش گەمەکەرېش با، واڎە گەمەکەردەیچشا شش دەیېقۍ بۊ.
هەرمانۍ گوزەریېنۍ و دەسورە ششیەکایچ بەرېنۍ ڕاوە.
ساعبێوە وەشو پایېزی، کەرەشېڵ سەعات پەنج و ویس دەیېقۍ هایش بیۆ و دەسش کەرد قوولنای.
(هەر) قوشقی بی و جە قسەکەردەیوە ئاڵوزانەنە واتش:
قانوون و دەسورۍ ئېمە جە ماباقی دەسورا ڕېک و پېک تەرېنۍ و لادای چەنەشا، لادایا جە قانوونە شش مادەیەکا، مشیۊ تاوانبار سزا دریۊ ، پەوکەی کەرەشېڵ دریا قەنارە.
ماباقی حێوانا پاسە تۊقەێ، کە ئیتر قانوونەکەی پېسە وېش بە بۍ زیاڎ و کەم جا بە جا کەرېنۍ.
دماو چن ساڵا (هەر) ئازارەش گېرتەو کەوت گېیان کەنېشت،
شېریچ چەنی چن حێوانێوە لوا پەی سەروەشیش و واتش:
من و چن حێوانێوە تەر تاوېنمۍ هۊربېزمېوە و وەروو دەسورات گېرمۍ، وەلێم گەرەکما نەبۍ ئاژاولۍ گنۊ دلۍ جەنگەڵی. دیسان شېر پەرساش ئەو هەری:
کریۊ واچی: وەروو چېشی ئی دەسوراتېتە نیێرەو ئی زوڵم و زۊرتە کەرد؟
(هەر) کەردشۆ جواب: ئەر من وەروو هەریەتیم بازە دەسورێم نیەیرە، شمە چی ئی چن ساڵە پېسەو بزا گواراتا کەرد و سەرە و خوېڕی گەریتا نامنارە؟[1]