نامۊ بەرهەمی: داروو ئاشتی
بابەت: داستانەو زارۊڵا
نویسەر: ڕەئووف مەحموودپوور
چاپ و پەخش: زایەڵە
ئی بەرهەمە داستانێوە تازۍ تایبەت بە زاروڵانە، چەنی ئانەی لەزەت بەردەی ڕۊحی و خجڵیای سوودبەخشانە پەی زاروڵا وەرچەم گیریان، بابەت و ناواخنی ماناداریچش چەنە گونجیان و بەزوانێوی پاراو و زاروڵە پەسەنڎ ئامادە کریان.
وېناکاری دلۍ ئی کتېبیە کاروو خانم (گونا خەرامان)ۍ بېیەن.
جە بەشێوە کتیبەکەیەنە ئامان:
خەڵک واچۍ: ئا درەختە ڕازېوە گۆرېش دڵشەنە حەشار دێنە. بېژگە سوفی زانای، کەس پا ڕازۍ نمەزانۊ.
سوفی زانا پیالێوە ڕیش چەرمەی ئېسک سووک بۍ، گرڎ حەفتێو جاریێ، ئاڎییچ ڕوەکاو چوارشەمەیەنە، ئۍ سەیه و ئی درەختی، سەرو تەوەنەکۍ بنېشەوە نیشېرە. تارەکەیش گېرۍ دەسەوە، بە ئاهەنگېوە دڵنەواز ئارېشەوە دەنگ، دەمو ئاهەنگەکەیەوە مەلێ سەرو درەختەکەی نیشېنۍ وە‌نای. هیچکام نەپڕېنۍ، خەڵکوو ئا دەوروبەریچە کۊ بېنېوە و عال گۊشش پەی دارېنۍ.
ئانە حۆت مانگۍ ڕەبەق بۍ وریا چا دەوروبەرانە خولیېوە تاکو جە ڕازه و ئا سازیه و ئا درەختیە بېیاوۊنە، لوێ لاو هەرکەسی، بۍ سوود بۍ، گرڎ کەس پەی لاو سوفی زانای ڕانموونیش کەرۍ. سوفی زانایچ ڕازی نەبۍ و ڕازەکۍ لاو کەسیۆ نەدرکنۍ، بەڵام وریا کۊڵ نەڎۍ و دەسبەردار نەبۍ.[1]