مامۊسا سەعدوڵڵای هەجیجی شاعېرێ تەڕ دەس
مامۊسا میرزا (سەعدۆڵڵا هەجیجی) تەبعێوی لەتیفش بېیەن، کە پەی هەر بەسەرئامێوە بابەتە شېعرێوەش نیانەرە، ئیجا ئۊسایانە دەسو هونەریش کەردەن ملو خامەو خیاڵی و زەوق
و ئیحساسوو دەروونیش کەردەن بارگەو قافڵەو ئاوەزی و چوون نەقاشێوە تەڕدەس تابلۊ و بابەتەکېش ڕازنانۆ،
تۊشەش بېیەن ئەشعاری نەغز و قاسیدچش بېیەن ۋاو شەماڵی .ئەچی شېعرېنە دەرماگنۊ پەی چەنی بە بەهانەو (وەزاوە) ملۊ پەی دەگاو (کەکڵیاوای)
پەی پەرسەو تاتەو مەڵاحسەینی، ڕای دوور و درېژ تەی کەرۊ، بەڵام هیچ چېوېش مشتەمەگنۊ، بە دەسی هاڵی گېڵۊوە دماوە.
پەی مەڵاحسەینی:
مەڵاحسەین گېیان حاجی زاڎەکەم
برای عەزیزم وەش نەهاڎەکەم
بە عەزمی دیدەن بېیام مېمانت
بە ئەحواڵ پەرسی جە برایانت
بە یەواش، یەواش بە ناعەلاجی
ئامام پەی پەرسەو مەرحوومی حاجی
قامەت چوون کەمان، دەس بە عەساوە
ڕووم نیام وە ڕای (کەکڵیاوا) وە
(سەعد) مەحکوومی ئیتاعەی نەفسەن
پەی (وەزا) ئامان، بەهانەش پەرسەن
مەڵڵا جە جواب سەعدی بېچارە
نە جیای دڵوەشی ئینەش نیارە.
جوابوو مەڵڵا حسەینی:
میرزام بە خەیر بەی مانی نەبینە
چېشت ئاوەردەن، تا چېو بەرینە؟
بە ڕیشی چەرمەت، سمېڵ مەردانەت
دانێوە (وەزی) مەنیەی گیرفانەت
فرە کەس ئامان جوابم کەردۍ
فەسڵوو وەهاری گرد سەردای بەردۍ
وەزی خۊ نەبېی جە ڕوە و ڕاسی
پەرسە (ئیبرایمووعەودەوئەڵماسی)
ئەر دانە دانێو زیاڎەو دەردۍ
ئاڎییچۍ تەمام سمۊرەی بەرڎۍ.
سۆهراب مورادنیا.[1]