گۆری ئاوی مجا، گولانۍ دەسېش ۋزانە:
گەر بە کەردەیی کەرمېش، یانی گەر جامڵێ ئاوی سەرو قاڵیەو یانەینە مجمۍ، وینمۍ زارۊڵە گولانەکۍ بە پەلە دەسۍ و قاچېش ۋزانەو گەمەش چەنە کەران.
ئا کەردە بېیەن بە ئیدیۆمێ بەکار ئامان، ئاوی مادەن، زارۊڵۍ دەسېش ۋزانە، چوونکوم زارۊڵە هەر دەم لاسایۍ گۆرەکا کەرۊوە، گەر هەر ڕەفتارێ ناشیرین جە لاو ئەڎا و تاتەیۆ، یان گۆرەکاوە کریۊن، بە ئاسانی زارۊڵەکېشا لاسایېشا کەراوەو ئاڎییچۍ عەینو ڕەفتاری کەران، نەک هەر ئانە، بەڵکوم جە گوفتاریچەنە عەینو چېویەن، پەوکەی گەر زارۊڵێوە ڕەفتارێ گول و خراپ کەرۊن، یان گوفتێ ناشیرین بەی دەمشەرە، یەکسەر ماچان: ئانە خەتاو گۆرەکانە، ئاڎیۍ وەڵېنە ئا ئاوېشا متېتە، پەوکەی ئیساتۍ زارۊڵەکېچشا، دەسېش ۋزانە.[1]