دیاری کردنی یاریزانانی هەڵبژاردەی ئێراق بۆ بەشداری لەپاڵەوانێتی گۆڕەپان و مەیدانی وڵاتانی عەرەبی کە بڕیارە یارییەکانی لە ڕێکەوتی 20 تا 24ی حوزەیرانی 2023 و لە وڵاتی مەغریب بەڕێوە بچێت دەستی پێ کردوو لە ڕکابەرییەکانی گەیشتن بە ڕیزی هەڵبژاردەکە و لەسەر ئاستی کچان بۆ یاری 400 مەتر کیژە پاڵەوانی پێشمەرگە #ئەڤین سەعید# توانی بە کاتی 58 چرکە پلەی یەکەم بەدەست بهێنێت و بە و ئەنجامەش نازناوی ئەو پاڵاوتنەی بۆ گەیشتن بە ڕیزی هەڵبژاردەی ئێراق مسۆگەر کرد .
نزار ئەکرەم سەرپەرشتیار و ڕاهێنەری تیپەکەی کچانی پێشمەرگە لە شاری بەغداوە بە پێشمەرگە سپۆرتی ڕاگەیاند کە ئەوان ئامادەکاریان بۆ ئەو پاڵەوانێتییە بە شێوەیەکی زۆر باش کردووە و خۆش بەختانەش لە دەست پێکی یارییەکانی پاڵاوتن ئەڤینی کچە یاریزانی یانەکەمان ، یانەی وەرزشی پێشمەرگە توانی بە ئاستێکی بەرز ببینرێت و بە 58 چرکە نازناوی پاڵاوتنەکەی بەدەست هێنا ، ناوبراو وتیشی پاش ئەو ئاستەی پیشانی دا ، د ، تاڵیب سەرۆکی یەکێتی گۆڕەپان و مەیدانی ئێراق ڕایگەیاند کە سەرسامە بە و ئاست و ئەنجامە و ستایشی کیژە پاڵەوانەکەی پێشمەرگەی سلێمانی کرد .
جێگەی باسە شاری ڕبات لە وڵاتی مەغریب میوانداری ئەو پاڵەوانێتییە یە کە هەڵبژاردەی وڵاتانی عەرەبی بۆ هەردوو ئاستەکانی کوڕان و کچان تێیدا بەشداری دەکەن .[1]