خەنجەرە مڎۊ سمەرا
بڕێ کەسۍ سەرو تېری قسۍ کەران، ئاگاشا جە بار و زروفو خەڵکا تەری نېیەن، وەختێ چن کەسێ خەریکۍ چارەو کېشێوەنۍ، گەرەکشانەن گرفتەکاشان چارە بکەران، مەگنا واتە و گۊشگېرتەی چەنی یۊترینی، پەرس و ڕا مەکەران، پەی تاکتیکێ مەگېڵان کە بتاوان بە زوویی بېیاونۊشان چارەسەر، بەڵام عەینو وەختیچەنە زەلامێ تەر ئاماڎە بېیە دلۍ کۊنیشتەکەینە، پەیلوێ سادۍ و چارۍ نەگونجیێ تەرحە مەکەرۊن پەیشان، بە ئەقڵو وېش پېکانشو چارەو گرفتەکەیش واتەن، ئاڎییچۍ داخیېنە ماچان: کورە بابە ئاڎ خەنجەرە مڎۊ سمەرا، ئەجۊش ئی گرفتەو ئېمە هەر پاسە ئاسانا!
سمەری بۊشېنۍ، خەنجەرە بە ئاسانی وەزۊرە، هیچ زەحمەتێش گەرەک نېیەن، ئانەیچ بېیەن بە ئیدیۆمێ پەی ئا کەسا بەکارمێ هەکە بە سادەیی و ساویلکەیی ملانە دلۍ گرفتەکاو گەرەکشانەن بە بۍ مانیای و زەحمەت و ۋیرۆکەردەی چارەشان بکەران، هەم دیس پەی ئا کەسان بەکارمێ هەکە دەسوەڵێ و مەسرووفېنۍ، گەر سات و سەودێوەنە بەشدارۍ بان، قیمەتێ فرەتەر مڎان بە کاڵاکا، نەفەرەکۍ تەرۍ مەواچان: ئاڎ نەمانیان پا زەڕەیۆ، پېسەنە خەنجەرە بڎۊ سمەرا.[1]