حەمە ژەنی مارۊ
بەشۍ: حۆتەمە
شەرمینە کناچۍ گۆرێ مەتی شەمعێم بۍ و فرە بەینش چەنی من وەش بێ، فرە حەز کەرېنێ وینووش. مەتی شەمعێم دماو نان و چایەکەی لوا بەر، قەدرێوش پۆ شی و ئاماوە و واتش:
بخوڎا ڕۊڵە حەمە شانست نیا، وەنۊشە جە هیزیۆن لوێنە یانەو مەتیێش پەی بەڵخەی، ڕەنگا ۋېرەگا بێوە، پەلەتا چېشا ئۍ شەو چیگە بێدۍ و سەوای ملدۍ.
بە ئەژنیەی ئی قسێ تەمام دڵم گیریارە. کاک ڕەحیمم دیا پەیم و ملېوش لار نېیا و واتش: وەڵا مەتی گېیان ئاما و لوای ئی دیم و ئۆ دیمی ئیسە فرە سەختا، مەکریۆ بنیشمێ و مشیۊ بلمێ.
بە نائۆمێڎی خوڎاحافێزیما جە مەتیێم کەرد و گېڵایمێ ڕوەو حدودی. هەرچی کەرېنێ قاچێم نێنێم چەنی و هەنگامەم پەی هۆرنەگیریێ. وەختێو کۆتێمێ وەراوەروو سۆسەکانێ، دوورۆ دەگاکێ ئەجۍ مەنزەرێوا و نەقاشیت کەردێنە. مڵکا دۆر دێبێ و سەرو بانەکاش چەرمە کەرېوە. هەر وېمۆ ڕەحمم لوابێ سەرو دەگاکێرە و زوو زوو دیێنێوە ئۆ دما. ئاخرش زۊرم پەی ئاما و پەرسام کاک ڕەحیمم: ئەرۍ یانەو وەنۊشێ کامەنە؟ کۆتەن کوگەو دەگێوە؟
کاک ڕەحیمم زاناش دڵم گیریانەرە و وەزعەم خاسە نېیەنە، زەردە خوێوش کەرد و واتش:
ئەهااااااا ئانەیچە دڵداری! تۊ هەڵای وەنۊشڵێت نەڎیێنە ئۆگارەنی، ئیسە من فەرخیە ویس و پەنج ساڵێن هامسامەنە! مەنعەو منیچ کەرېنی. چووزانوو یانەو تاتەو وەنۊشێ چکۆن، تەنیا ئانەیە مزانوو، هامساو یانەو مەتیێمەنە. من یانەو ئاڎییشانە وەنۊشەم دیێنە.
مەزانوو چی کاک ڕەحیمم هەر وېشۆ تووڕە دیار بێ، بە نەزەرەم داخەو فەرخیلێ گەرەکش بۍ بە من مجۆ!
وەخت بە بۍ وچان لوای لوێ، کوچما ئاماوە دەگا، ئیسە ئیتر ڕەفێقەکێچم ئانڎە سوکنایی بە دلێم نەڎێنێ. ڕوێو مەتی شەمعێم ئاماوە پیڎیمەرە. پاسە دیار بۍ گرد بەڵېنێوەش لا یانەو تاتەو وەنۊشێوە هۆرگرتەبێ. تاتەم و کاکە ڕەحیمم، بە بۊنەو وەزعەو حدودیۆ، قەرارشا پاسە نیارە، هەم هیجبی کەردەی و هەمیچ مارەبڕیەیش کەراوە یۊ.
ڕەزا بەهمەنی.[1]