قەڎر گېرتەی جە دوۍ خانما هۆرامانی
نویستەی: #هەورامان ڕۆستەمی#
گوزارشوو ڕاوەلواو مەراسموو ڕېز گېرتەی جە خاتوو (عالیە حەسەن زادە) و (خاتوو شەهین زەبێحی) جە لایەنوو تاقمەو یاران کۆو وەشەویسی.
ڕۆدیاروو یەرەشەممەی (11) مانگەو ئارگای (97 ک.ڕ) سەرو بڕیاری وەڵینوو لێژنەو وەرپەرسی تاقمەو یارانکۆو وەشەویسی تاقمێو جە چالاکاو مەدەنی، فەرهەنگی و ڕۊشنویری و هەرپاسە نمایەندەو ڕېکوزیا مەدنیەکاو شاروو مەریوانی سەردانوو یانەو ئی دوە خاتوونە ئێژا و وەشەویساشە کەرد.
ئی دوە خاتوونە کەبۊنو هەرمانە دڵسۊزانەکا و یاوەریدای خەڵکی هەژار و کەم دەسەڵاتوو شارېوە ئەژناسیەینێ و بە ئەوپەڕوو ویر بەرزی، مانیا نەژناسی و بین درێژیەوە سەرەڕاو هەرمانێ فەرمیێ وېشا جە ئێدارەو بێهزیستی شاروو مەریوانېیەنە، سەرقاڵوو کۊ کەردەو یارمەتی پەی بنەماڵە هەژارەکا و بن بڕ کەردەو دیاردەو ناشیرینوو سواڵێ و وەرگیری کەردەی جە مەسرەفوو مادەی هۊشبەری و دەیان چالاکیێ تەریەنێ، جە لایەنوو لێژنەیەوە شایانوو ڕېزگېرتەی ئەژمار کریەی و جە مەراسمېوی شکۆدارەنە ، تێکڕا و هەرکام جە یانەو وېشانە ڕېزشا چەنە گېریا.
چی ئەرەنیشتەنە، چن کەسێ بە نمایەندەگی ماباقی ئازیزا سەرو ڕوڵوو ژەنێ جە کۊمەڵگانە و هەرپاسە سەرو چالاکیەکاو ئی دوە وەشەویسەیەوە قسێ و باسێوی چڕ و پڕشا کەرد.
کۆتایی مەراسمەکەیەنە بە ئەوەوەنای لۆح و تەندیسوو تاقمەو یاران کۆو وەشەویسی و بەخشای خەڵاتی، ڕېزیوی تایبەتشا چەنە کریا و هەرکام چی دوە خاتوونە نازارەیچە بە ئەوپەڕوو چەنەئامایەوە سپاسوو تاقمەو یاران کۆو وەشەویسیشا کەرد و ئېشارەشا کەرد کە ئی تەندیسە بۍ وێنەن لاشاوە و مانیایشا سیانەوە.
ئێژاو وەتەیا کە تاقمەو یاران کۆو وەشەویسی ڕېک وزیان جە نمایەندەو ئەنجۆمەنە فەرهەنگی و ئەدەبیەکاو شاروو مەریوانی و هەرپاسە دەسېو جە ڕۊڵە نیشتیمان پەروەرەکاو وەڵاتی کە سەر بە هیچ ڕېکوزیا یام جەریانېوی نېیەنێ و یەکجار سەربەوێ و وێپا هەرمانە و چالاکی کەرا.[1]