بە نامۍ سەرجەم گردو شەهیدا
نویستەی: #هەورامان ڕۆستەمی#
بەیانیەو تاقمێو جە نویسەرا، کەسایەتیە فەرهەنگی ئەدەبی و ژیوگاپارێزاو هۆرامانی به بۊنەو (3) خەرمانانی، ساڵڕۆو کۆچوو شەهێڎاو ژیوگای.
ئازیزا، بەشدار بېیاو کۆڕێ، خەڵکوو سەربەرزوو زاگرۆسی و سەرجەم ویژدانە هەڎەرەکاو دنیای
ژیوگا جە ئاوەزوو سەردەمو ئارۊینە بنەما و ئێلمانێوی بەرزا و پارێزنایش پەی هەر کۊمەڵگایە یاگێ فەخر و شانازینە. هەر نەتەوێو تاوۆ چی ڕاسەوە برەو بڎۆ بە ویر و ئەندیشەو ئەوەڕازنای و ترۆقوو ژیوگای، تاوانش تێکەڵبۊ بە ئاوەزوو سەردەمی و بەختەوەری و شانازی چەسپنۆنه پەی وېش و سەوزایی و ژیوای پەی سەرجەم بەشەریەتی تۆمار کەرۊنه.
کۊمەڵگاو کورڎەواری دلێ ژیواو ئارۊینە تاوانش بە هێمەت و هەوڵوو ڕۊڵەکاش ئی ڕۊت و ڕەوشە بەرزەیە بژناسۆ، لەیەکش بڎۆوە و پەی گەشەی و ترۆقیش هەزینە کەرۊ و ئێژایی تایبەتش پەی بنیۆرە. به جۊرێو که تاخیت ئازیزتەرین ڕۊڵەکێچش پەی ئی ویرە بەرز و ئارۊیانەیە گېیانشا نیانەرە و وەرانوەر چەنی ناحەزاو ژیوگای قەقنەس ئاسا سۆچیەنێ، تاکو ژیوگا پارێزیۆ و گەل و نیشتمان جە سێبەرەو ئی درەختە ڕېخەداره بەرزانە و ئی ویرە سەوزەیەنە سەیۆوە و به ئاسوودەیی بژیوۆ.
هۆرامانی سەربەرزیچ هەر کۆنەوه تاکو ئیسه، ئێژایی و حۆرمەتی تایبەتش پەی درەخت و ژیوگای نیانەرە. قەڎر زانای و قۆرسایی نیارەی پەی ژیوگای و سەوزەڵانی جە کانگاو دڵوو هەر تاکێوی هۆرامینە بە لووشاوی شەپۆلێ مشانۆ و دیارگایوی سەرینەنه، هەن وەروو چەماوه. پەوکای مەحاڵوو هۆرامانی چی ڕاسەوە یاگێ و پلە و پایێوی تایبەتش پەی وەرچەم گیریان و ئینه که واچیا، یاگێ حیچ نکووڵیێویش نېیەنه چنه.
پېسەو تاقمێو جە ژیوگا پارێزاو مەحاڵوو هۆرامانی، وره و تینۊ هەڵمەتەو ئازیزاو ژیوگا پارێزناو چیای هەمیشە وەشەسیای، بەرز و ئێژادار منیەیمێره و یاگێشا گلینەو چەمامانە مزانمۍ. وەراوەر به لێرەی یەهەرداروو ئا ئازیزاوه پەی خاک و نیشتمانی، وېما وامدار و قەرزارێ هەرمانێ حەماسیێشا مزانمۍ و بە دڕیژایی کڵپەو هەرمانە ماندگارەکاشا قەڎرشناسێ زەحمەتەکاشانمێ. هەر وەروو ئانەیه و ئارۊ جە ساڵیادوو شەهیداو ژیوگای، ئازیزا کاکە شەریف و کاکە ئۆمێد و کاک ڕەحمەت و کاک مۆحەممەد یەنە، یەکدەنگ هاوار کەرمۍ هۆرامان ئینا چنیتا و پەی درێژەدای ڕەوەشە پیرۊزەکەیتا ئۆقرەش وەنە بڕیان و تاکو یاوای پا وینگە بەرزەیە دەس جە تەلاش و هەڵمەتەو پاڕیزناو ژیوگای بە پشتیوانی ئەندیشەی سەوزیتا نمەکېشۆ و دووبارە و چڼینبارە چەنی نەریتوو ژیوگا پارێزنایتا پەیمانەو عەهد و وەفای تازە کەرۊوە. تاکو ڕۊح و ئەندیشەی سەوزتا، ئاسوودە و سەرکۆتە و بەردەوام، شەماڵ ئاسا شاخ و داخه بەرزەکانه، سەوزەڵانی دەره قووڵ و دەشته وەرهەڵاکا چەمڎاری کەرۊ.
تاقمێو جە نویسەرا، کەسایەتیە فەرهەنگی ئەدەبی و ژیوگاپارێزاو هۆرامانی.
ئێژاو واتەیا کە ئی بەیانیێ سەرو گڵکۆی پیرۊزوو شەهیداوە جە مەراسمېوی شکۊمەندەنە، وانیاوە.[1]