قۊناغەو هەرزەکاریم
بەشۍ: نۊهەمە
ژیوایم جە سویدەنە
دوە مانگیو هوتیلېوەی نیمەخاسە شارېوەنە بېنمۍ تاکو شوقەما پەێ بەرپشۊ. چېوێچ کە فرە نامۊ و غەریب بۍ پێم، ئانەبۍ کە واتێشا وېرەگاو جومعەی و شەممەیا چېرو ژوورەکەو من تاکو سەعات یەرۍ شەوۍ گرم و هوڕو دیسکۆی و هات و هاوارو بەری و سەروەشا بۍ. منیچ ئا وەختە چەپێوی ئیدیاڵی بېنۍ، بە حەقەت ئەهلو دیسکۆو بەری و چېوی نەبېنۍ.
حەر چېگە بېنمۍ مامو نوشیروان دوەیەرۍ سەفەرۍ لاو مام ئەختیاری برایش کەردۍ جە پۆڵۆنیا، دماتەر بە نیازو ۋانای لوا پەی واگەیە. پا جۊرە تەنیا ڕەفیقێ کە نزیک و قۆم و ئاشنام بۍ، وە دڵم پەنەش کریېوە، جە یەکتری بڕیایمۍ. منیچ تاوېنۍ بلو شۊنەو وەعدەکەو پارتیەرە، زەمالە هۊرگېرو، بەڵام وەزعەی تەندروستیەم فرە وېش نەبۍ، دماو ئانەیچە کە وېچم دماتەر سەردایم کەردۍ، دیم مەزاهەرەو چېو دژو حکومەتو ئا وەختەو پۆڵۆنیایچ کە کۊمۆنیستی بۍ دەسش پەنە کەردەبۍ، ناسەقام گیریش پۆوە دیارە بۍ. ۋەرو ئانەیە خېیاڵو واناو ئاگەیمە جە ویرو وېم بەرکەرد، بەڵکوم دماو ساڵېوی جە سویدەنە دەسم پەنە کەرد.
وەهار و هامنو سویدی حەتا دڵت گېرۊ وەش و خەمگینا، گوڵۍ هەزار بەهەزار باڵدارۍ کوچکەرۍ حەرپاسە. وەشتەرین بۊنەو هامنەو سویدی جەژنەو دلېڕاسەو هامنیا، مەبارەکو کولتوری و دینی و سونەتیا. بۊنەکێچ کەرو (24/23) مانگەو ششی، بەپاو ساڵۍ فەرق کەرۊ. زل و گولانە بە تایبە مەکتەبیۍ دڵوەشېنۍ. پارکو شارینە بە جلۍ ڕەنگاوڕەنگېوە جەژنە گېڵناو هورپڕای سونەتی کەراو گورانیۍ سونەتیۍ ماچا. منیچ کە پەی یەکەم جاری دماو ئا گرد ناڕەحەتیاو ڕێ و سەردا و سڵېوەو زمسانیوی درېژی پېسەو تەماشەچی بەشدار بېیا، کە پاسە دڵگیربۍ کە بی بە یادگاری و زهنمەنە کە هەتا ئیسەیچشە چەنی بوو هەر ساڵېو ئا بۊنەیە نە وینو یاگېش فرە دیارەنە.
یانەم گەڕەکېوەو قەراخو شاریۆ پەی بەرشیە بە نامۍ(نێسبی) . نامۍ جادەکێچم (جادەو بەتالیۆن 16) ی بۍ، چوونکوم نامۍ جادەکاو گەڕەکەکۍ گرد عەسکەریۍ بېنۍ. نێسبی سەنتەرېوی فرە وەشش بۍ، کە پېکئامابۍ جە کتېبخانێوی فەرعی، بانقی، بەرید، دوۍ سۆپەر مارکیتی ڕەقیبی یەکتری، گوڵ ورەشېو، دوکانو ڤیدیۆی، چەنی نان و شیرینی ورەشېوی زەریفی کە تاوینیچ بنیشیەرەو شیرینی و قاوەیچ بوەری. ئینۍ گرد چېرو یەک سەقفیویەنە بېنۍ. ساحیبەکېچشا گرد سویدیۍ بېنۍ. دماو سی ساڵا بە مەئمووریەت لوانۍ پەی ئا کتېبخانە فەرعیەیە، دیم ئا سەنتەرە ئاوەڎان و ڕۆنەقدار و مودیڕنە زیاتەر ئۆ جەنگزەدەی کەرۍ، بېجگە کتبخانەکەی هیچ کام چا یاگا سەرۆ باسم کەردۍ نەمەنېبېنی. بانق و بەرید و گوڵ ورەشی و نان و شیرینی وەرەشی و دوکانو ڤیدیۆ و سوپەرمارکێتە سویدیەکی فاڕیێبېنۍ بە دوکانۍ شەرقیۍ، یۊشا کورد بۍ، یۊیچشا عەرەب، نان وشیرینی ورەشەکێچ بیەبۍ چایخانەو سۆماڵیاو دۊمینەو چېوش چەنە کەرېنۍ و تەسبېحۍ وا دېنۍ. منیچ کە ئا وەزعېمە دییە فرە دڵم گیریارە، چوونکوم یاڎگاریۍ فرە وەشېم بېنۍ چەنەش، وەرو وېمەرە بەعزێو گلەیېم کەردۍو بەعزیویچ سوید ڕۊیچم کەرد.
من چېگە نیمە سویدی فېر بېیا، بەڵام ۋەرو ئانەیەە نیازو زانکۆیم بۍ چەنی مەسئولەکەیم قسېم کەردۍ. دماو حەفتېوی کیاستاش پەی لووندی کە شەس کم دووربۍ، چاگە ئیمتیحانېوشا چەنە گېرتا کە بلو زوانی سویدی وانو کە مناسبو زانکۆی بو. ئیمتیحانەکەنە بەرشېیاو کۊرسەکەنە (دۆرەو وېئاماڎەکەردەی) ش واچېنۍ هورگیریانۍ. نیم ساڵێ هامۆشەم کەردە، دماتەر ژوورێ چەنی موشتەمەلاتی، بەشو ناوخۆییم پەی بەرشی. ڕۊ (28-2-1986) کە شەوەکېش ڕەئیس وزەراو سویدیشا وەرو بەرەو سینەمێنە کوشتەبۍ، من بارم کەرد پەی لوندی.
فاروق سان ئەحمەد.[1]