نا پەی توڼ و تیژی دژ بە ژەنا
پەی ژەنە ئاگاو هۊشېیارەکا، هەر پاسە پەی پیا ڕۊشن ویر و یەکسانوازەکا گرد ڕۊەو (25) و نوامبریا.
بەپاو ڕاپۆرتو نەتەوە یۊگېرتەکا و ڕېکۋزیا مرۊییەکا،
هەرجە (18) چرکێنە ژەنېوە گنۊ وەرو توڼ و تیژی، هەر بە واتەو ئی ڕېکۋزیایا ئامارو کوشتەی ژەنا دوە قاتو پیایان.
توڼ و تیژی دیاردېوی جەهانیا کەتا ئیسەیچ جە (53) وڵاتێ جەهانېیەنە توڼ و تیژی و سووکایەتی کەردەی بە ژەنا جە چوارچېوەو هامسەرداریەنە بە تاوان حەساب نەکریان.
ئەرکوو گرد ئینسانېوی ئازادیواز، ڕۊشن وېر و یەکسانوازیا کە دژو کەردەی نائینسانی توڼ و تیژی و ژەن کۊشتەی هەڵوەست گېرۆ.
با هەردویما پێوە پەی بنبڕکەردەی ناعەداڵەتی،
پەی ئەوەتاونای کلتوورو توڼ و تیژی و ژەن کۊشتەی، پەی کۊمەڵگەوی یەکسانواز و شایستەسالاری هەوڵ بڎەیمێ و ئاماڎێ فاڕیای بنەڕەتی و ڕاستەقینەی بیمۍ، ئینەیچە تەنیا بە ئێرادە و ئازایەتی و نەتەرسای ژەن و پیا ئازادیواز و ئێنساندۆستەکا کریۆ و بەرهەمەکەیچش پەی خزمەتو ئینسانیەتی و وەڵکۆتەو کۊمەڵگای بۊ.
ژەن و پېیا دوە باڵێ پەلەوەرێویەنێ، جە کۊمەڵگانە لاواز بېیەی هەر کام جە باڵەکا، بۍ هېزی و لاوازی کۊمەڵگایا.
ژەن و پېیا تەمامکەرۍ (مکمل) یەکتری و هېزو کۊمەگایەنێ.
شیرین جەلالی.[1]