وەردەنگی پیشەیی شێعرێ کێن؟
نویستەی: #عادل محەمەدپوور#
وەردەنگ ئا وانەرە چالاکەنە کە پەراوێزوو دەقینە وېش بە دیاردێ لاوەکیېوە نمەخجڵنۆ، بەڵکەم چەپەوانەو ڕەوەکەردی پۆپۆلیستی، بە جێددی بۍ جیاوازی، پیشەیی هەرمانەو نرخ ژناسی مەتنی کەرۊنە، دەقێ سەرکۆتێ و تۆپەڵە دەقێ جە یۆی پاڵفتنۆنە.
تەجرۆبەی هونەریی وەردەنگی کارای هەمان ڕەخنەوانی پەڕهاز و ساحێب زەکا و پڕۆفیشناڵەن، سەرەڕاو زەوقی هونەری و ئەدەبی، پیشەتەوەریچەن و ئیمانش هەن بە هەرمانەو ڕەوشمەڼیی نویستەی و دەسەڵاتوو دەقی کارای و ئێژانەو هەرمانەو شاعێری ئەوەخېزنی و پڕۆسەو تازەوازیی بە کردار فام کەرۊنەو هەمتەر ڕەخنە و ڕەخنەوانی بە چەمۍ و مەژگ و زوان و ئەدەبېیاتی مزانۆنە.
وینگاو نویسەرو ئی دێڕاوە، وانەری پیشەیی هەمان ڕەخنەوانەن. ڕەخنەوانیچ بەپاو شارەزاییش ملو هەرمانەو نرخنایو دەقیرە، تینەتش جۊرێوەن کە نمەتاوۊ کەسېوی قازانجوازبۊ، بەڵکوم هیتیارېوی زەوقتەوەرەن کە بە دەسەڵاتی پیشەیی، زەمینوو زەینی دەقەکا، کاڵۆوە و چېروچوەرشا مکەرۊنە و گەوهەرۍ و خڕەپەڵێ جە یۆی پاڵفتنۆنە و چەوتیی و ڕاسیەکاشا موزۆنە سارای واقێعی بېیەی.[1]