پیرەژەنێ کۊرە و پاشا
چەنی دەرباریا لوا پەی ڕاوێ، کەشەو لوا شۆنەو نەچیرێوەرە، شەوە ئاما ملەرەو ڕاش وڵانا و دەسش جە هامڕایا بڕیا، هیچش پەی نەکریا هۆساروو ئەسپەکەیش شل کەرد و هەتا ڕوەش کەردە هەریاگێ ئێۮیچ بلۆ، فرەیوە ڕاوە بێنێ هەتا بېیابانەو یاوێ لاو دەوارێوە، بارام چڕیش ئاوەۮانی مێمانێتا گەرەکا ڕاش وڵاونەیبۊ؟ پیرە ژەنەیوە بە دەنگێ کزەو واتش: مێمان وەشەسیاو خوۮاین فەرماوە، بارام لوا چوەر.
پیرە ژەنەکێ کۊرە بۍ و چن بزەێش بێنێ و تەنیا چەنی کناچڵێوە ژیوێ، هەکە بارام ئاما چوەر پیرە ژەنەکێ بە کناچڵەکېش وات: ڕۊڵەگېیان لوە کوچالەی شۊت دۆشە بارەش پەی ئی مێمانیە، کناچڵەکێچ چوون بارام جلێ ڕاوېش پورە بێنێ نەزاناش پاۮشان.
کناچڵێچ شۊتش ئاردو بارام شۊتەکەش وارد و یاگێشا پەی یاوارە و ئێژیارە.
بارام هەڵای نەوتەبۍ و تەماشەو ئاسمانی کەرۍ، وەروو وېشرە واتش: ئی حێواندارا ماڵیاتشا چی لەوەڕگایانە لەوەڕیا مشیۊ چی پووشانە نەۮا؟ ساعبێ یاونیەو قەسرە مشیۊ پووشانەشا پەی بنیەورە.
ڕۊ بیەو پیرە ژەنەکێ بە کناچڵەکېش وات: ڕۊڵە گېیان لوە شۊت دۆشە پەی وەردڵوو مێمانەکەیما! کناچڵەکێ نەما باۮیەوە لوا شۊت دۆشای، دەسش دا گوانوو هەر بزېوە دیش شۊتش نېیا و وشکش کەردەن! دەسی هاڵی بە سەرسامییەو گېڵاوە و واتش ئەۮا سەمەرەن هیزی شەوۍ بزەکێ گوانېشا پەڕێ بێنێ، وەلێم ئیسە وشکشا کەردەن!
پیرە ژەنەکێ وات کناچڵەکێم سەرەت سڕ نەمەنۆ، دڵنیەی بە شا ورمێ خرابش دیێنمێ پەی.
بارامیچ کە گۊشش چی قسێوە بۍ سەرەش سڕمەنە و وەروو وېشرە واتش: خۊ من جلێ پاۮشاییم نېیەنێ پۊرە و هەڵای چېوېم نەدرکنان؟ ئی پیرە ژەنێ کۊرەنە چەنیش زانا من نیهاۮم بەۮا؟ پەرساش وەنەو پیرە ژەنەکی: ئەۮا گېیان چی تۊ پاۮشات دیەن یام مشناسیش؟ چەنی ئی قسێ کەری؟
پیرە ژەنەکێ کەردشەو جواب: لالۊ گېیان وېت مزانی من کۊرەنا چکۆتاو پاۮشا وینوو تەنانەت بە عەمرم نزیکیچەو نەیاوێنا بە هیچ پاۮشەیوە، وەلێم بە تەجرەبەرە زانوو هەر عانێ پاۮشا زڵم و زۊر کەرۊ وەنەو ڕەعیەتی عاسمان و زەمین و حێوانیچ وەرچەم تەنگێ باو وشکەساڵی و نەوەشی سەرانسەرو وەڵاتی گېرۆرە.
پووشانە، زەڕێوە بۍ دریێ بە ساحێب ئاڵف جاڕێوە کە حێوانەکەشا چا ئاڵف جاڕەنە لەوەڕنابێ.[1]