فەقی عوسمان
وەختێ مەولانا خالیڎی نەقشبەڼی سەرو فەرمایېشتەکەو شېخ عەبدوڵڵاو دەهلەوی وەڵاتو هیندستانیش جېیائاستو ڕاو ئێرانیرە گېڵاوە پەی سلێمانی، خەڵکێ فرە جە زانا و مەڵڵایا لوێ پېوایشۆ، تەمەسوکشان پەنەکەرد، فرېشان بیۍ بە موریدېش. یۊ چا کەسا کە گەنجێ وریاو ئاقڵ، خەڵکو شارەکڵەو تەۋېڵۍ هۆرامانی بە نامۍ (فەقی عوسمان) مەبۊن بە موریدش، چا وەختەنە فەقی عوسمان جە شارو بەغڎای، دلۍ مزگی حەزرەتو شېخ عەبدولقادرو گەیلانینە خەریکو دەرس وانای بېیەن، هەر دەم گېڵان شۊنەو مورشیدێرە کە تەریقەتش چەنە وەرگېرۊو ڕاو لاو خوڎایش نیشانە بدۊن، پەوکەی وەختێ مەولانا یاوان شارو بەغڎای، لوان خزمەتو غەوسی گەیلانی، فەقی عوسمان یەکسەر تەمەسوکش پۆ کەردەنو بېیەن بە موریدش.
مەولانا وەختێ گېڵانۆ پەی سلێمانی وەهار و هامنېنه تەشریفش بەردەن پەی هۆرامانی، چوونکوم بە زاروڵەی و بە گەنجی فەترێ فرە هۆرامان ژیوان، فرە شارەزابېیەن، چاگە مەنەنۆو خەریکو ئیرشادی بېیەن، چا سەفەراشەنە فەقی عوسمان هامڕاش بېیەن و خزمەتشەنە بېیەن، خەرێکو سلووکو تەریقەتی بېیەن.
پېسە مەزانمی دمای سەفەری یەکجاری مەولانای پەی شامی و جېیائاستەی کوردەسانی، فەقێ عوسمان لوانە چېرو ئا بارە قورسەیەو بی بە جاگەگیرو مەولانای، مەولانا تەریقەش تەسلیمو ئاڎیی کەرد.
تەمەنو سی و یەرە ساڵینە تەریقەتش وەرگېرتەن.[1]