پۊختێوە جە تاریخو هۆرامانی و سرووشتو ژیوای خەڵکەکەیش
بەشۍ: سیهەمە
نویستەی: #ئیبراهیم میکە عەلی#
ئایین و ئایینداریی جە هۆرامان
باس جە حاڵ و وەزعەو هۆرامانی و ئایینیش وەڵیٛ ئیسلامینە فرە ڕوٙشن نېیا و حەرچی وچیوٙ ئەشوٙم یام پەشتی پا شوٙنەما و دەمواچا بەسوٙ هەکە مەنیٛنیٛ جیا، یام بە مەزەنڎە و بەراوردکاری نەتیجێوە گیٛریوٙ، چوونکوم حیچ سەرچەمېوە نویسیاما نەمەنەن وەرو دەسینە، تاقە سەرچەمېوە هەکە هۆرامی نویستەبوٙ و بشیوٙ بڕواش پەنە کریوٙ و فرەو ڕواوە بە وردیی باسو هۆرامانیش کەردەن، ئا کتیٛبەنە هەکە مەڵڵا عەبدوڵای مەردوٙخی (شەیدا)ی بە زوانی فارسی و چیٛرو نامیٛ (تاریخ سلاطين هورامان)ینە ساڵەو (1322) کوٙچینە دەسش بە نویستەیش کەردەن و ماوەو یەریٛ ساڵانە نویستەنش، داخەی سەختە ئانیٛنە هەکە ئی کتیٛبە وەختو ویٛشەنە چاپ و وەڵاو نەبېیەنۆ و بە دەسنویسیی مەنەنۆ هەتا ساڵەکاو (1383 و 1386) کوٙچی ڕوٙجیاریی یانی (15) ساڵێوە چی سەردەمو ئیٛمە وەڵتەر، بەرکەوت کتیٛبەکە یەریٛ بەشیٛ سەرەتایش هەکە باس جە وېیەردەو هۆرامانی بېیەن وەڵیٛ ئیسلامینە فەوتیان و ئا یەرە بەشە جە کتیٛبەکەی هەکە مەنەبیٛوە بە دویٛ تەشکیٛ جیێ چاپو وەڵاو کریاوە، پا وەساسەتۆ یوٙ جە سەرچەمە بنەڕەتیەکاما فەوتیا و ئیٛتر چاگۆ قسەکەردەی سەرو بابەتو ئایینداری هۆرامانی وەڵیٛ ئیسلامینە بیٛناز کەوتەن.[1]