ژیوای بەهمەنی و ئێرانی
چن ساڵێ چېوەڵ، ژەنېوە بۍ بە نامۍ (ئێرانخاتوون)ێ.
ئاد٘ە گردچېوېش بێ، سەروەت، زەریفی، بڕوا بەوێ و نێگایېوە دڵبەریە و قژۍ سیاوێ و درێژێ پېسە شەوەو یەڵدای.
خیابانێوە تارانینە چەنی کوڕێوە بە نامۍ (بەهمەن)ی ئاشنا بیە. جوانێوە بە ڕواڵەت، زەریف بە ویرێ تازەوە.
بەهمەن، هەمیشە پەنەش واچۍ: تۊ گرد٘ چېوېت هەن، بەڵام تاکو وەختێ ئازاد٘ە نەبی، هیچت نیا!
تۆ عاشقەنی، دڵبەسێنی، بەڵام وېت نېیەنی. دایېم کەلیمێ ئازاد٘ی سەرو دیواروو یانەیشاوە نویسێ و وزێش دڵەتەپێ.
ئێرانە ئا وەختا جوانە بۍ و شۊنی تەجرۆبەتازەکاو ژیوایەو بێ. یاوا داراتێوە کە گنۆ شۊنی بەهمەنی و یاوۆ پانەیە کە تاکو ئیسە نەبېیەنش!
زمسانێوە سەرد٘ و زوقماوینە، شوەکەش دەسشەو ناهۆمێد٘ بی و پەی هەمیشەی جیاش ئاستە و ئاخرش چنی بەهمەنی یاوێ یۆترینی و (22) ڕابڕانی زەماوند٘ەشا کەردە و جەژنێوە عالەشا گېرتە.
کوڵ و کۆتا واچوونە، هەرچی پێوەرە ژیوایشا لوێ وەرەو، بەهمەن ئا قەوڵێ کە بە ئێرانېش دایبێنێ، فەرامۆشش کەردێ.
تا یاوا یاگێوە، ڕەنگەو جلا و وارد٘ەی و نۊشایش و تەنانەت چەنی ژیوایش، بەهمەن پەیش هۊرچنێ!
پینەیچەو نەمردێ و جارجاریچ زرەپنېش. ئێرانە، بێجگە ئاهو ناڵەی، زاتش نەبۍ فززە کەرۊنە.
ئیسە، دماو چل ساڵا، ئێرانە ژەنێوە ناهۆمێد٘ە و سووچە نشینە، مەڕیای دڵە، ڕەنگەی زەردە و بېزار جە ژیوایەنە و هامسایەکېش کە سەردەمانێوە بە حەسرەتەو و بە حۆرمەتەو تەماشەش کەرېنێ، ئیسە پەنەش مەخوانێ و واق واقێوە مد٘یاش پۊرە.
جە حاڵێوەنە بەهمەن هەوڵێ مد٘ۆ، دلێ نەهامەتی و خەمەکاشەنە، هەرچی ساڵەن، یادەوەری زەماوندێشا وەشتەر جە وەڵێ جەژنە گېرۆ و وېش وەشبەخت نیشانە بد٘ۆنە!
ئێرانە، هەمیشە بە وېش ماچۊنە: ئەر من وەڵێ بەهمەنینە ئازاد٘یم نەبېیایێ، چەنی تاوێنا شوو کەروو بەهمەنی؟!
جە خاتوو ئێرانێ، کناچېوە مەنێنەوە نامېش وەهارەنە.
بە وەهارێ ماچۊ: ڕۊڵە هیچوەخت کڵاوەو بەهمەن ناما نەلۆ سەرەت!
پەنەش ماچۊ:
ئازاد٘ی وەختێوەن کە بتاوی جە بېیەیت لەزەت بەری و خوەی ڕاس ڕاسی سیماتەو وېش برمانۆ.
پەنەش ماچۊ:
وەهار گېیان، هۊشت نەشۆ، هیچوەخت پەی یاوای بە مانگەشەوۍ، ڕۊجیاری نەورەشی.
نویستەی: لەیلا
هۊرئەوەگېڵنای: شارۆ.[1]