چەنی جە خێرئامای مانگەو ڕەمەزانینە بیمێ و چەنی خێرئامایش وەنەکەرمۍ
وەڵێ گرد چیوینە مانگەو ڕەمەزانی مانگێوە ڕۊح سوک و ئێسک سوکەنە، ڕەزا شیرینەنە، پەڕەنە خەیرو بەرەکەت، مانگەو لەش ساقییەنە (حەر کەس گەرەکشا لاشەش ساقبۊ، ئانە با ڕۊچێ گېرۆ، مانگەو پاک بېیەیۆنە جە گوناحەکاما، مانگەو تەحصیل حاسڵاتینە، مانگەو قورئانوانای و دەورکەردەیۆنە، مانگەو خەیرێ و سەڎەقە کەردەینە، مانگەو دڵەکانە هەکە وېشا پاکو پوخت و بێگەرد و زاخاو بڎاوە، حەرچی پیسی و چەپەڵی و ژەنگوژار هەن گرڎی فڕە بڎا، جە (خەشمێ و قینێ و چەمچنۆکی وچەم پیسی وغەیبەتی و حەسودی و جاسوسی کەردەی سەرو یۆترینیۆ) چینیشا گرڎی وېشا پاککەراوە.
مانگەو بەخشاینە و مانگە پاککەردەیۆ مڵکو ماڵیا بە زەکات دایشا، مانگەو نماکەردەینە ( نماو تەراویحاو نماو صەلات و تەزبیحینە) و مانگەو عیبادەتی و خوائەشناسایا، مانگەو زیکرو تەلیلەینە، مانگەو دڵئارامی و وازئاردەین جە گرد چېوە دنیاییەکا و وێ خەریککەردەی و وکۊڵکەردەیا پەی ئۆ لای و ڕاو ئۆ لای و عاقیبەت خەیری و ڕوو سوری و سەرفرازی و سەربەرزی جە حزورو دروسکەرو بەدیئاوردەینە، يانى مانگەو حەولوتەقەلا دای پەی ژیوایێ حەتا حەتایی تەری. مانگەو ئاوەڎانی ڕۊح و گیانەکانە، پاککەردەیشاو زاخاودایشا، دما جار سافوبێگەرڎ کەرڎەی دڵ و دەرونی و ناخەکا پەی جوانتەر ژیوای چی دنیێ فانیێنە تاکو تاویۊ فرە جوانتەرو خاستەر ئاینزاکێ و ئاڎەمیەکێ پێوەرە ژیواو ژیوای کەرا، حەتا زیاتەر ئی دنیێ خاس و ئاوەڎانکەراوە، حەر پاسە ئی مانگێ مانگەو دەسگرۆییکەردەی فەقیرو هەژارانە، ماڵوسەروەت و سامان بەخشای پەنەشاو داوەت کەردەیشا پەی سەرو سفرەو خوانی. حەر پاسە ئی مانگێ مانگەو زارۆڵە چەمگەشەکانە مزگی پاڎیشاوە جواناو ئاوەڎانکریۊوە.
هیدایەت هۆرامی _ مەلازادە.[1]