خوڎا بڕۊ عومرو تووتەی
گەر قەسابخانەنە نەبەرۊش سەر
ئی ئیدیۆۍ بە دوۍ مانێ مەی: مانای یەکەمەشان باس جە وەش ژیوای کەرۊن، پېسە مەزانمۍ وەشتەرین واردەو تووتەی گۊشتەن، بەڵام بە زەحمەت دەسش مەگنۊن، خۊ گەر چواردۆرو قەسابخانەینە بژیوۊن، ئانە وەشتەرین ژیوایش هەن. مەبەس چا کەسانە هەکە ئینێ دلۍ ژیوایێ پەڕ جە ناز و نیعمەتینە، بۍ دڵی وېشان نمەکەران، هەرچیشان حەز چەنەبۊن پېڎاش مەکەران و مەوەرانەش، بە کوڵی مەبەسش ئانەن ژیوای چا گەنە وەش هەن هەکە ئینسان حەزش چەنەن و دڵش پەنەوەش هەن.
مانای دوەمەش پېچەوانېنە، تالېق دایەن چا کەسا هەکە دلۍ ژیوای ئی دنیێنە غەرقۍ بیېنۍ و تەنیا خەمو وېشانەن، ئاگاشا جە کەس و کاریشان نېیەن، هەر خەریکۍ لەوەڕنای ورگیشانۍ و ئاگاشا جە دنیاو ماریفەتی و دینداری و زانستی نېیەنە.[1]