پەشیمانی قازی جە حوکموو ئێعدامی
کەلاس قاڵ بۍ هەتا ئوستاد ئاما مسیارێ (دانشجوێ) مرکیەیرە، چوون ئەوەڵ ڕۊ دانشگای بۍ حاڵ و هەوایێ تایبەتم بۍ، ئاخ ڕشتەو حقۆقی، فرەم کۊشا هەتا بەو دلۍ ئی ڕشتەیە، هەکە ئامانێچ شانازیش پۆکەرېنێ، چی وت و ویرەنە بێنێ ئوستاد پېسە واچی فکروو گرۮوو مسیارەکاش وەنانەو بە دەنگی بەرز دەس وەشی قەبووڵ بېیەیش کەرد وەنە گرۮوو مسیارا.
ئوستاد یۆجە سەرەبەرشیەتەرین ونامۮارتەرین مامۊسایا بۍ، ئاڕوە ویرە وەریێش (خاطرە)کۊرنایمێوە پەی کە هەتا ئاخروو وەنایم بی بە سەرمەشقوو مەشقیم.
ئوستاد تازە پاش نېیا بۍ پیری و قازی دادگای بۍ، خەیلێوەن ئی ویرە وەریشە کۊرنەینمێوە پەی وەلێم هیمای ئینا مەژگمەنە
ئوستاد ئاڕوە شێنەی و سەرو وێ بە مسیارەکاش وات: مسیارە ئازیزەکام ! زانوو گردتتا بە هۆمێۮوو قازی بېیەی و وەکێڵ بېیەیەو ئامێندێ دلۍ ئی ڕشتە مەبارەکیە، وەلێم وریەی بیدێ ئەرکێوە گەورە کەوتەن سەرو شاناتا، ویجدانێوە بێۮارش گەرەکا هەتا جەڕاو ڕاسی و پاکی نەترازیەیدێ، هەناسەیوەش هۆرکېشا و دەسێش ئارد سەرەرە و بە ناڕەحەتی و خەفەتەو واتش: ساڵەها چەیوەڵ قازی شوعبێوە بێنێ و تازەکاریچ نەبېنێ، بەڵام پېسەو ئیسەیە سەرەم بەرنەشێ، ڕوێ پەی پەروەندەیوە مەجبوور بېیانێ حوکموو ئێعدامی بڌەو، ئاڕۆمە خاس ویرا فرە ناڕەحەت و خەمبار بێنێ، دماو مانگێوە بەرکەوت ئی پیا بۍ تاوان بېیەن و حوکمەکەم ناهەقا، واروو چوەرێ فرەم کەرد حوکمەکەی ماڕوو وەلێم داخەکێم دەسەنە بەرشیە بۍ و پەیم قەرەبوو نەکریاوە.
چڼۮە دماتەر ڕوێ شوعبەنە ئای ئێنێ بەر خودکارەکۍ دەسمەو کەوتەرە ، پیەیوە سیاوپۊش هاوارش کەرد ئەهای ئەسڵەحەکەت کەوتەرە! بە غەرەزەو دیانیش پەی، ئاۮیچ کەردشەو جواب: تۊ پی قەڵەمە تاتەت دانێ قەنارە،
هەرسی پڕەی چەمېشوو هەناسەیوەش هۊر کېشت و واتش: ئاگاتابۊ ڕەنگا هەڵەتا هیچ وەختێ قەرەبوو نەکریۊوە، فرە زویچ دێربۆ.[1]