باسێوی کۊتا سەرو دیاردەو وېکوشتەی
گردو ژیوایم بە دوێ ویرێ دژبەرێ سەر کەردەن
خوزگە مەردەبېیایانێ، بەڵام دڵوەشنا هەوڵەکام پەی وێکوشتەی سەرشا نەگەرت.
  کلانسی_مارتن، فیلسووف و ڕۊماننویسی نامدار و مامۆستا جە زانکۆو میزۊری، دماو دە کەڕەتێ هەوڵوو وێکوشتەی بێ‌ئاکامی دلۍ کتېبەکەیشەنە بە نامۍ ٫(چەنی وېما نەکوشمێوە؟)منویسۆ:
دمایین جار، هەوڵم دا جە چیرزەمینوو یانەکەیمەنە بە پەتەو ملو تووتەکەیم کۆتایی باروو بە ژیوای. پېسەو گرد جارێوی وەسیەتم نەنویست. تووتەکەم سەرو پلکانەکاوە تەماشام کەرۍ، مێزوو نویستەکەیم ئاورد پەی چېرزەمینەکەی، لوانی سەرو مێزەکەی و پەتەکێم بە بنمیچوو چېرزەمینەکەیوە هاڵۆچنارە و ئەوسەرەکەش پېسەو پەتەو سێدارەی کەردم ملمەرە و وردە وردە بە پایوم مێزەکەم چېروو پایامەنە لابەرد.
پەلەقاژێم دەسش پەنە کەرد. ئێش و ئازاروو ملیم خەریک بۍ هەناسەم بڕۊ، ‌ بەڵام هەڵای ئاگاڎار بێنا. تەرس و دڵەڕاوکێ ئامانش بڕیەبێنا. بەرەنگاروو تەرس و دڵەڕاوکێ مدرانیوە، بەڵام فرەتەر پەشۆکنانیش. چی ساتەوەختەنە خاس ویرم نېیا دەسم ماشنا. لای سەری پەتەکێم گېرت. تەقالایە فرێم کەردە، وەر بېیانێ و کەوتانېرە سەرو زەمینی.
ماوەیە سەرو زمینەکەیوە پاڵ کەوتانێ. تاویە دماتەر، بە تەلەفوون تەکوو هامژیوایەکێم کە سەفەرەنە بێ، قسێم کەردێ واتش دەنگت واڕیان. قوڕگەت مېشۊ؟ چای و زەنجەبێڵ بوەرە. منیچ ئێتر حیچم نەوات پەنەش، واتم باش.
گرد جاریە دەروونمەنە دەنگیە هانیم مەڎۆ و ماچۊ؛ مارتین فرە هیلاک و مانیانی، تەمامش کەرە وېت کوشە و نەجات بڎە. حەر جار ویر مەکەروو ژیوایم فرە بێ‌مانا و ئامانجەن، یەکەم چارەسەر مەی مەژگمەورە، وێکوشتەین. چا ساتەنە دڵنیانا خاستەرین ڕاچارەم ئانەنە وېم کوشوو، دماتەر مەژگم ئارام مەبۊوە، مەوینوو حیچ ڕاستیە و ئەقڵانیەتیە دلی ئی ویریمەنە نېیەن.
سپاسگوزارەنا ئێسە نەمەردەنا و ژیوایم بەردەواما. مەزانۇو فرە سەیرەن ئی ویرمە کە ماچوو؛ وەختش هەن وېم کوشوو و دیسان هەمیچ ماچوو بەختەوەرەنا ئاکاموو وێکوشتەکام ڕەزگاری بێ.
  بە ڕاسی نائاسایی نېیەن دوێ ویری ناکۆکێ؛ ژیوای و وێکوشتەی دلۍ سەرەیمانە شەپۆلیا بڎا، ئی ناکۆکیە ماچاش پنە هەڵەی مەعرێفەتی. ناتەبایی مەعریفی بنەماو وێ خەڵەتناین، ئینە نموونەو یۊ جە ویرە نائەقڵانییە قووڵەکاو ئێنسانین. بەبۍ گومانە حەر ئی ناعەقڵانییە قووڵەنە هەکە ئېمەی ئێنسانش کەردەن گېیانداریە یاگێ سەرەنجی.
ئارۊ دڵوەش هەنا زیڼەنا و سپاسگوزارەنا حیچ وەخت نەتاوام وېم کوشوەوە. بڕوام ئانەنە وێکوشتەی هۊرچنیایوی خراوەن پەی گرد کەسی. من بە قووڵی جە حەزوو وێ کوشتەی یاوانانە، نەک حەر حەز کەردەی جە مەردەی، بەڵکووم حەز کەردەی جە ژیوایچ. هاندای پەی وێ خنیکیایی، مەی و مەلۆ، جە ژیوایمەنە هۆرکەوتەن چن ڕویە ویرم پەنە نەکەردەبۊوە، بەڵام یەک حەفتەش نەخاینان.
وێکوشتەی پەرسێوەنە پەی گرد کەسی، پەوکەتی لازمەن باسش کەرمۍ. فرە جارێ بە فېڕوازەکام ماچوو ئەر ئێنسان دلۍ لەمێشەنە کرێڵیە بېیایا پەی وێکوشتەی، کەس تاکو 18ساڵەیی زیڼە نەمانێ.
لازمەن واچوو ئەر ویروو وێکوشتەی هەن سەرەتانە هاگاڎارێ بیدێ، ویرێوی خاس نېیەن، چارەسەرو هیچ کېشێوی نېیەن، تەنیا لازمەن تەکوو وېت بۍ بەزەیانە، هۆرز و نیشت نەکەری تاکو ڕاسیەکەی پېسەو من بە چەمو وېت بوینی.
کێن_باڵدوین پەی وێکوشتەی وەختیە جە پردەو گوڵدن گەیتینە بازیش بەردە و نەمەرد، ماچۊ؛   ئا وەختە بازەکێم بەردە و پەیم بەرکەوت؛ ئا چېوانە پاسە زانێنا جە ژیوایمەنە چارەسەرشا نېیەن، گردی ڕاچارەشا هەن، بێجگە ئی پەڼێ (باز بەردەیە) ئاوردەم ملو وېمەرە.
هۆرەوەگېڵنای و کورت کەردەیوە سەرو کوردی- هۆرامی: عێرفان سوبحانی.[1]