گۊبەڼ بە قنگا
گۊبەڼ، یام گۊبەڼە بە ماناو گرفتی و ئاژاولۍ و کېشمەکېشی مەی، چن کەسێ یاگێنە گرفتێ ڕوەمڎۊ میانشانە، دەسکەران دەنگەدەنگ و قېڕنای، ڕەنگە بیاوۊ جەنگیچ، ئا بار و حاڵە پەنەش ماچمۍ گۊبەڼە. چا وەختەنە پیێوە مەی و ماچۊ دا ئی گۊبەڼی بەردۍ لێوەرە، یام چېگەی دوورەش وزدێ. بڕێ کەسۍ هەنۍ هەر دەم سەربەئاژاولېنۍ، بلا هەر یاگێ، دلۍ هەر کۊنیشێ، بەزمێ منیاوە، خەڵک گلېرمەبۊوە وەنەشان.
ئیتر خەڵکی مشناسۊشان و هۆڵۍ مڎان نزیکشان نەگناوە، پەنەش ماچان ئی کابرا گۊبەڼ بە قنگا، یانی بلۊ هەر یاگێ گۊبەڼێ ئینا قنگەشۆ، یام هەر یاگێ قنگەش داوە، گۊبەڼێ قۊمیۊ.
بڕێ جاریچ ڕەنگە گلېرۆبیەکە پەی وەشی بۊن، پېسە گۊرانی واتەی و ئاهەنگی، بەڵام نزیک بە یانەو خەڵکی، کابرای ساحیب یانە مزیۊرەو گۊبەڼەکۍ تېکە مڎۊن.[1]