ئاسکێوە دلیٛو تەویلەو هەرانە
هورگیٛڵنای: #ئیبراهیم میکە عەلی#
بەشۍ یەرەمە
هەرەکیٛ ڕووەشا کەردۆ یوترینی و واتشا: ئاژەڵێوە نەفامەنە، خاسا پەی چیٛشی گرەووٛ؟!
ڕوەشا کەردە ئاسکەکیٛ و واتشا: توٛ ویٛت نەفامەنی گیان، ئیٛمە خجڵیٛنمیٛ خاسە کەرمیٛ چەنی توٛ، وەلێم توٛ تانە و تەشەریٛما مڎەیوەنە؟!
هەرێشا ملش نیا و ئاما وەرۆ سینەش زنی و واتش: شەیتان بەلەعنەتبی، ماچی بلو لەقێوە دەو سینەش و کوشوش.
یوٛتەریچشا پرمناش و واتش: لەوەڕی سەوزش گەرەکا و منەتەو کەسیچ نمەزانوٛ.
یوٛ تەریچشا بزێوەش کەرد و واتش: پەلە مەکەردیٛ هەرئیسەتیٛ حاڵییەش کەرو.
ئاما وەرۆ و لەقێوەشدا سمو ئاسکەکیٛ.
یوٛ تەریچشا جوتلێوەش شانا و ئاما وەرۆ و لەقێوەشدا لەمەو ئاسکەکیٛ.
یوٛتەریچشا قەپێوەش گیٛرتە لاقو ئاسکەکیٛ.
ئاسکەکیٛ تاوەو ئیٛشی و عەزرەتیېنە، هوٛشو ویٛش شیە و کەوتە سەرو زەمینی.
هەرە ژیرەکەیشا وات: جەماعەت هەرمانێوە خراپەتا کەردە، خاسا ئی داماگیٛ خەتاش چیٛشەنە پاسەتا پەنە کەردە؟ چی دنیێنە هەزار جوٛریٛ ئاژەڵیٛ هەنیٛ، ئینیٛچ یوٛشانە، فریٛشا ژیوایشا و ویرۆکەردەیشا چەنی ئیٛمە جیاوازا، دەی خوٛ مەکریۆ گرد پیٛسەو ئیٛمەبا و پیٛسەو ئیٛمە بژیوا و پیٛسەو ئیٛمە ویر بکەراوە، ئیٛمە سمەر و یەویٛ موەرمیٛ، دەی ئاسکی ئانەی نمەوەروٛ، دەی خوٛ ئینە خەتا و گوناح نیا، ئیتر چ پەنەوازا لەقیٛش دەیدیٛ وەنە و قەپیٛش گیٛردیٛ وەنە؟! هەرمانێوە خراپەتا کەردە پاسەتا پەنەکەردە.
هەرەکیٛچ بە توڕەییۆ واتشا: گردش خەتاو توٛ بیٛ سەرەتاوە ڕووەت داپەنە و نازت هورگیٛرتە، ئەگەر ڕاست گەرەکا قسەکیٛ توٛ بییٛ بایسو ئانەی گرەووٛ، ئیٛنڎا ئاوراییٛنە مەجبورە بیٛ سمەرەکا بوەروٛنە و تیٛر لەوەڕیوٛ و بواچوٛ: بەخ چ لەزەتییٛنیٛ.
هەکە ڕوٛ بیۆ کابرای بسانو ئاسکەکیٛ ئاما پەی تەویلەکەی تا هەرەکا بەروٛ پەی هەرمانیٛ، هەکە بەرەش کەردۆ و دیا مڎیوٛ ئاسکەکیٛ کونجێونە کەوتیٛنە و بەحاڵ هەناسە مڎوٛ، دڵش پەیش سوٛت و بەزەیش سیاوە پوٛرە، گیٛرتەش باوشیۆ و بەردەشۆ پەی یانەو ڕاوچیەکەی و واتش: بڎیە برادەر من بیٛجگە تەویلەکەیم یاگێوە تەرەم نەبیٛ، شەویٛ ئاسکەکیٛم کەردە لاو هەرەکام دلیٛ تەویلەکەی، پاسە دیارا ئی ئاسکیٛ چەنی هەرەکا مەساچوٛ و مەسازیا چەنیش، ئیٛشەو دێنەشا وەرو لەقا و پیٛسەشا پەنە کەردیٛنە، من بەزەیم سیاوە پوٛرە و ئاردەمۆ پەیت، ها گیٛرە خەمێش بوەرە و پەی زەڕەکەیچ پەلەم نیا هەروەخت بیت ئا وەختە پەنج تمەنەکەم دۆ.
ڕاوچیەکە ئاسکەکیٛش دەسۆ گیٛرت و چنڎ ڕوێوە وەیشکەردە هەتا کوچێ ئاماوە سەرو ویٛش و بەردەش پەی باخچەو ئاژەڵا و داش بە پەنجا تمەنیٛ و پەنج تمەنەکەو کابرایچش داوە.
باخچەو ئاژەڵانە ئاسکەکیٛشا وستە دلیٛ بەشەو ئاسکا، فرە وەشحاڵەبیٛ و یاگەکیٛش بەدڵە بیٛ و فرەو وەختی ڕمبازانی کەریٛ و ورئیٛوە.
ئاسکەکیٛ دلیٛ باخچەکەی لوٛمەش کەریٛنیٛ و واچیٛنیٛ: ئاسکێوە سەرگەردانە و سەروەنەشیٛوێنی، ئیٛنڎا چی زینڎانەنە چەنی تاوی ئانڎە دڵت وەشبوٛ و بیٛخەمەبی؟! ئەریٛ توٛ چکوٛوە ئامێنی پاسە ئانڎە دڵت وەشا؟!
ئاسکەکیٛ وات: وازم چەنە باردیٛ با بەدڵو ویٛم کەیف بکەروو، من جەهەنەمۆ ئامێنا، پانەی دڵم وەشا چیٛگە هیچنەبوٛ خوٛ میاومیٛنە یوٛترینی و تاومیٛ قسیٛ دڵو ویٛما کەرمیٛ پەی یوٛترینی، من چینەی فرە خراپتەرم دیەن، ئیٛگە چەمو ئا تەویلەو هەرانە هەکە منش چەنە بیٛنیٛ، فرە وەشا و بەهەشتێوەن پەی ویٛش، دڵنیێ بیدیٛ ژیوای چەنی ناڕەسەنی جە جەهەڼەمی خراپتەر و گولتەرا.[1]