کورد دلۍ چەرخەکا تاریخینە
بەشۍ: دوەسەڎ و حەفتا و یەرەمە
نویستەی: #هاوڕێ باخەوان#
ساڵەو (1919ز.): چن تۊمارێ پېوەس پی ساڵېوە ئینێ وەردەسەنە:
* ئەچی ساڵېنە، ڕەشید ئەفەڼی ئاسیە خان جە چەمچەماڵ شەهید کریان، نامبریا ئەفسەرو دلۍ سوپاکۍ شېخ مەحمووڎی بېیەن.
* پایېزو ئی ساڵېنە، سمکۆ ناوچەکانو سەرنیشتو ڕۊخانەو ورمێش وستۍ چېرو دەسەڵاتو وېش.
* هامنو ئی ساڵېنە، سمکۆ ڕاگاو میانو ورمێ و تەورېزی مەوزۊ چېرو کۆنترۆڵو وېش.
* ئەچی ساڵېنە، عەلیکی سەرخېڵو هەڤێرکانی دلۍ قۊمیێوە لېڵ و نادیارېنە کوشییان.
* کۊچی دمایینو ئەمین یمنی سڵێمان ئەحمەدی شاعېر ئەچی ساڵېنە بېیەن.
* ئەچی ساڵېنە، حەمە عەلی مەدهۆشی شاعېر ئامان دنیا.
* ئەچی ساڵېنە، عەبدولمەجید ڕەشید بەرواری ئامان دنیا.
* ئەچی ساڵېنە، سمکۆ وېش ئاماڎەکەرد پەی ئانەی سەربەوېیی کوردەسانی مسۆگەر بکەرۊن، پا نیازیچۆ پېوەڼییش کەرد بە سەرخېڵە کوردەکاوە، سەی تەهای ژەنبراش کیاست پەی بەغڎای تاکو پېوەڼی چەنی ئینگلیزەکا پتەو بکەرۊن.
* ئەچی ساڵېنە، کتېبیانەو بابانەکا دلۍ مزگی گۆرەو شارو سلێمانینە بە دەسو ئینگلیزەکا سۊچیان، کە شش هەزار کتېبېش چەنە بیېنۍ، دماتەر تەنیا چوارسەڎ کتېبېشا مەنېنێ و بریێنۍ پەی کتېبیانەو ئەوقافو سلێمانی.
* جافەکۍ ناوچەو هەڵەبجەی بە فیتو ئینگلیزی، کۆتۍ دژبەری چەنی شېخ مەحمووڎی.
* ئەچی ساڵېنە، ناکۊکی میانو داگیرکەری ئێرانی و کوردی زیاڎبی، ئانەیچە بە هۊکارو پیلانەو کوشتەی سمکۆی و کیاستەی فەرماندارێ تازەی بۍ پەی ورمێ.
* پەی یەکەمین جاری ئەچی ساڵېنە، ئینگلیزەکۍ سەیارەشان ئاردەنە شارو سلێمانی.
* ئەچی ساڵېنە، ئینگلیزەکۍ (ئیسماعیل سەعید بەگ)شا کەرد بە فەرمانڕەواو ڕەواندوزی.[1]