بابا سەنعان ڕۊ جەهانی زاڕوڵاش دوور جە ماواو وېش پیروز کەرد
گرڎ ساڵێ دنیانە (1-6) بە ڕۊو جەهانی زاڕوڵا ئەژناسیان، چی ڕوەنە ڕیکۋزیێ و گروپەکێ زاڕوڵا بە گورانیێ و چالاکیێ زاڕوڵانێ، زاڕوڵا وەشحاڵ مەکەرا.
گروپو پەپولەکا هۆرامانیچ پېسە گروپێوی زاڕوڵا هۆرامانەنە ساڵانە بە چالاکیێ زاڕوڵا هۆرامانی و کوردەسانی کەرۊوە سەر و وەشحاڵێشا کەرۊ و دیاریشا مڎۆ پەنە.
دماو ئانەی ساڵا ۋېیەردەینە ئی دەسە چی ڕوەنە جە شارو خورماڵینە چند چالاکیېوەش بەردی ڕاوە، بەداخۆ بە تەرزێ ناڕاستەوخۆ دڵو دەسەکەی و ڕاوەبەرەکەیشا ماڕا، پا بۊنۆ دەسەکە ئێساڵ ڕۊو جەهانی زاڕوڵاش دوور جە یاگی و ماواو زاڕوڵەکا هۆرامانی بەرد ڕاوە و شارو سلیمانینە پیشوازیێ گەرمشا چەنە کریا و بە گورانیێ هۆرامیێ ئی ڕۊشا پیروز کەرد.
یاگی واتەین ئی گروپە ساڵانە یۊ جە زاڕوڵەکاو هۆرامانیش دەسنیشان کەرڎەن تا بە دیاری و سەوقاتی پەنەزانای گروپەکەی یاونو لاو زاڕوڵا، ئیساڵیچ (نمە نەریمان) هۆرامییە پیسە زاڕوڵێ چالاکەو بوارو زاڕوڵا هورچنیا تا خەڵاتو گروپو پەپولەکا هۆرامانیش پېشکەش کریۆ، نمە خانەیچ وەشحاڵیی وېش بەرۋست بە هورگیرتەو ئا خەڵاتەیە و هیواو سەرکۆتەیش پەی زاڕوڵا واست، بەتایبەت زاڕوڵا هۆرامانی و کوردەسانی و جەهانی بەگرڎیی.[1]