دووتاش جە گرڎ پۆسێوەنە مەرمانۆ
قۆقمێوە بە مارەمزووکێو واتش؛ بە واتێو من ژنەوتەنم بابە و باپیروو من و تۊ بابەبرای بېیێنێ. دووربەی، ئاساۋو کەتمان و زۊری خەلە و خەرمانوو کۊریش نەهاڕان و، واو شوومی داروو قەومیش ماڕان و، خومچی هەواروو ئەشقی مەرەزەو دەواروو مۆبەتیش واڕان. ئیسە کە بە دیڎاروو یۊی نووروو چەمیما گەش و حاڵوو دڵیما وەش هەن، سرمیچەو وەفای دارەڕاو سەفای کەرمې و بەڕۍو وەشەسیایی جە بڕەو جیایی بېیاومېرە و، کەشکی تەنیایی جە دەنگەو پیایی بساومېرە. خەمێ کۆسی بە کەمێ دۆسی وێچمێ و ڕېشوو وەیلانی بە مەیلانەو سۊزی پېچمێ.
یۆ هاوار کەرې خیاری ورەشێ
کە ئێنێ واچې ئینای کەشتەنە
فرێ ماتڵێ و پەرسېنێ چ کۆ
واچېشا پەنە ئینای دەشتەنە
قۆقمە بە زوانی چەورش دەوروو مارە مزووکیش داوە و، بە یۊوە لوای ڕاوە. سمحانە هەتا عەسر و وەراوا ڕاوېشا کەرڎې و قۆقمەی واردێ. مارەمزووک حەر لچېش لێسیېوە. پاش نېیا لێرەو وېشەرە و واتش: مامۆ؛ وەرگڕای هەتا وەرپڕای ڕاوېما کەرڎې و حەر تۊ واردێ. ئەر ئاوانی یانە باوانی پېسەن، حاشا و کەڵڵا، من نېیەنا. قۆقمە واتش: گېیانوو مامۆی؛ سەردڵ بناوە، حەر ئیسە هەتا سەڵاو سمحی حەر چیما یاوا، بەشو تۊن. مارەمزووک بە لاو لووتەیوە چەنەش هۊر گېرت.
ئەر تۊ ڕاس ماچی و هام شارۆ مەنی
تۆرەکەو حەر دوێ هینوو گرڎیەن
جە ماشگانە پەی وېت جەمێ کەری!
لێ پووش و دڕەیاچ بەشو وردېیەن؟
قۆقمە بە مارەمزووکی واتش وەرکەوت بە. حەر چی بۊ پەی تۊ بۊ و، ئەر مێشوولێوەچ لاو تۊوە فڕیا مەی لاو من و مەگېرووش. لاپەڕاکێ مارەمزووکی تەقیای بېنې یۊوە و دلې لەمش هاڕەش ئێ. وەرەتاو هازیش شەلای شەلێ و، نازش نەلێ. شەپڵاخێ ئەو وېش شانێ و دەرسێ وانێ. یۆ؛ ڕوەش سوور کەرې، چارش نەکەرۊ و، دوێ؛ زۊروو وېش کەرې بارش نەبەرۆ.
جە وەش باوەڕی وېت دەست مەوزا
جە ڕارە لواینە شۊ دوێ پای بجما
نەک ڕاس هۊر گېرۆ قول بە هەواوە
چاولایچوە سێخێ پای چەپی پسما
شەوەشا دا دەسو ڕۊیوە و، بوەشا نېیا بوەو یۊیوە. مارەمزووک دەسێ هاڵی و هەناسێ کاڵ. دەس نەکەوتە و دڵ نەسرەوتە گېڵاوە. مامەڵەو هۆزی سەرەش کاس و لەمەش ماسنا بې. ویرێنە گێجێ وەرێوە و، ئەوراینە پېچێ. حەر ئاڼەشە زانا مارێوە سەرەڕاش گېرت. لەلوەو چەمەریش جمنا و، تەرزەو یارمەتیش ڕەمنا. هاناش بې جواو و شینش بې سواو بې. دۆس ڕەنگەو بەینەتیش واڕای بې و، شەنگەو مۆبەتیش ماڕای. بېیەبێ تکێوە ئاوی و لوا بې زەمینەرە.
یۆ سەرەو دۆسی مەگېرۆ دۆس نېیەن
حەر کەسېو بمرۊ جە خێڵی کۆس نېیەن
پۆس هەراڵ و جەفت کەرۊنێنەش کونە
خۆ کونەیچ ئاویش کەرانە پۆس نېیەن
ئیبراهیم یەعقووبی.[1]