ژەن و شوویی چاپکریا
بەرهەمی تازە چاپ کریاو (ژەن‌‌وشوویی)، یۊ چا زنجیرە بەرهەمە بە پێزاو بواروو پەرۋەرڎەیەنە و بە وەرچەم‌گېرتەی ئەرکەکاو (ژەن و شوو)ی دەرهەق بە یۊترینی، بە قەڵەموو بەڕېز (ئیبراهیم ئەسلانی) پېسەو زەنجیرێوی سەرو بەشەکاو پەرۋەرڎەی نویسیاینێ و بە زوانی فارسی کەوتێنێ وەرو دەسو ژەن و شوەکا.
ئی بەرهەمە بە قەڵەموو خاتوو (ئاوێنە ئەحمەدی) بە زوانی هۆرامی هۆرگېڵیانەوە و وزیان وەرو سەرنجەو هۆگراو ئا بواری.
ئی بەرهەمە بە میتودېوی زانستی و ئەوەفامانە مجیانەرە و حازر کریان. متاوۆ پەی ترۆقدای بە گەشەو شېوازی زانستی و سەردەمیانەو هورسووڕیای ئەرکەکاو ژەن‌وشووی دەرهەق بە یۊترینی، قازانجاوی بۊ.
بە وەشیەوە بە زەحمەتی فرەو خاتوو «ئاوێنە ئەحمەدی» ئی بەرهەمە ئیسە بە زوانی شیرینی هۆرامی ئامادەن و ژەن‌وشوە ئازیز و بەتەرخەمەکاو مەحاڵی متاوا سوودش چەنە بەرا.
ئی بەرهەمە مانگەو گەلاوێژوو ساڵەو 1403 کۆچی ڕۊجیاری جە لاو «ئێنتشاراتوو زایەڵە»یەوە بە شېوازێوی ڕېک‌وپێک چاپ و پەخش کریانەوە.
مزانمې کتیبخانەو هۆرامانی جە بواروو پەرۋەرڎەی و دەروون‌شناسیەوە لاوازا. پەوکای ئی هەنگامېو خاتوو «ئاوێنە»یە بە بایەخ زانیۆ و لازمەن بە ئەمەکەوە سەرنجە پەنە دریۆ.
بە دەس‌وستەی و وانایۆ بەرهەمەکاو نویسەراو مەحاڵەکەیما، پەی ترۆقدای بە ڕۊتوو گەشەی و گەشاوەزیی، هەنگامەی کاریگەرە هۆرگېرمێ.[1]