بێهزاد قادری لەدایکبووی 1995ی زایینی لە شاری مەریوانی ڕۆژهەڵاتی کوردستانە و لە ساڵی 2018ەوە لە هەولێری پێتەختی هەرێمی کوردستان نیشتەجێیە. ناوبراو خاوەن بڕوانامەی بەکالۆریۆسی دەروونناسییە و ئێستا لە بواری ڕۆژنامەوانی و میدیاوە چالاکە و لە 2018ەوە تا ئێستا (2023) پێشمەرگە و کادری حدکایە و ئەزموونی کارکردن لە دوو کاناڵی میدیایی تیشک تیڤی و کوردکاناڵی هەیە. هاوکات لەگەڵ کاری میدیایی، بێهزاد قادری وەک ڕۆژنامەوان یادداشت و وتاری لە چەندین ڕۆژنامە و ماڵپەڕی ڕۆژهەڵات و باشووری کوردستان بڵاو کردووەتەوە. ناوبراو هاوکات چیرۆکیش دەنووسێت و لە ساڵی 2020دا لە هەولێر، یەکێک لە براوەکانی خەڵاتی ڕوانگە بۆ چیرۆکنووسی بوو. بێهزاد خاوەن سێ بەرهەمی چاپکراوە، کە بریتین لە:
- کۆمەڵەچیرۆکی نێچیری وەرزەکان/ مەریوان/ 2017
- کۆمەڵەچیرۆکی شاوەتی جنۆکە/ چاپی یەکەم/ مەریوان/ 2018
- کۆمەڵەچیرۆکی شاوەتی جنۆکە/ چاپی دووەم/ سوید/ 2022
- کۆمەڵەچیرۆکی تاوانی پیرۆز/ سوید/ 2022
شایانی باسە کە بێهزاد لە ماوەی ساڵانی 2013 تاکوو 2018، لە ئەنجومەنە مەدەنییەکانی شاری مەریوان چالاک بووە و ماوەی دوو ساڵیش وەک وانەبێژی زمانی کوردی بە شێوەی خۆبەخشانە خزمەتی کردووە. [1]