دواڕۆژ، پشتیوان جەمال
بەڕێوەبەرایەتی پۆلیسی دارستان و ژینگەی #سلێمانی# لە ساڵی ڕابردوودا 536 تۆمەتباری دەستگیرکردووە و دەستیشی بەسەر چەندین چەک و ئۆتۆمبێل و پێداویستی دیکە گرتووە کە 188یان ئامێری بیرلێدان بوون.
عەمید هێمن کەمەرخان، بەڕێوەبەری ڕاگەیاندنی بەڕێوەبەرایەتی پۆلیسی دارستان و ژینگەی سلێمانی لە کۆنگرەیەکی ڕۆژنامەوانیدا ئاماری چالاکییەکانی ساڵی ڕابردووی بەڕێوەبەرایەتییەکەیانی ئاشکراکرد و وتی: 536 تۆمەتبارمان لەسەر ئەم تۆمەتانە دەستگیرکردووە: 154 تۆمەتبار لەسەر ڕاوی باڵندەی کێوی، 55 تۆمەتبار لەسەر ڕاوی ئاژەڵی کێوی، 109 تۆمەتبار لەسەر ڕاوی ماسی، 8 تۆمەتبار لەسەر خەڵوزکردن، 113 تۆمەتبار لەسەر زیادەڕەوی، 78 تۆمەتبار لەسەر داربڕین، 19 تۆمەتبار لەسەر ئاگرکەوتنەوە.
ناوبراو ئاماژەی بەوەکرد: هەر لەساڵی ڕابردوودا دەستبەسەر چەندین جۆر لەپێداویستی دیکە گیراوە ئەوانیش کڵاشینکۆف و تاپڕ و لایت و بلاجکتۆر و چەقۆ و ئۆتۆمبێل و بەلەم.
عەمید هێمن ڕوونیشیکردەوە: لە ساڵی ڕابردوودا 55 ڕووداوی ئاگرکەوتنەوە ڕوویانداوە بەو هۆیەشەوە نزیکەی 29 هەزار و 153 دۆنم لە زەوی پاوان و ڕەز و باخی هاووڵاتیان سوتاون، زیاتر لە 375 داری سروشتی جیاوازیش سوتاون.
لەوەڵامی پرسیاری دواڕۆژ سەبارەت بەدەستگیرکردنی ئەو کەسانەی بیری ئیرتیوازییان لێداوە، عەمید هێمن ئاشکرایکرد: لەو 536 کەسە 113 تۆمەتبار لەسەر زیادەڕەویی بووە کە زۆربەیان لەسەر بیر لێدانە بەشێوەی نایاسایی، 188 ئامێری بیرلێدانیشمان ناردۆتەوە دەرەوەی هەرێم.[1]
#05-01-2019#