لەیادی 122 ساڵەی ڕۆژنامەگەری کوردیدا، پیرۆزبایی ئاراستەی ڕۆژنامەنوسان و دەزگاکانی ڕاگەیاندن لەهەرێمی کوردستان و مامۆستایان و خوێندکارانی میدیا لەبەشی تەکنیکی میدیا لەپەیمانگای تەکنیکی #سلێمانی# و کۆلێجی تەکنیکی میدیا دەکەم و ئومید دەکەم بەهەمومان، واتە ئێمە وەکو ناوەندە ئەکادیمییەکان و ئێوەش وەکو دەزگاکانی ڕاگەیاندن، بتوانین ڕۆژنامەگەری کوردی بەره و قۆناغێکی باشتر ببەین و وابکەین کە کۆلێج و پەیمانگاکانی ڕاگەیاندنمان باشتر و ڕاهێنراوترو کرداریانەتر لەجاران و بە ڕاهێنراوی لەبوارە تەکنیکییەکاندا بخەینە بەردەست، تاوەکو چی لەڕووی تەکنیکی و چی لەڕووی ناوەڕۆکەوە کادری میدیایی باشتر بەردەستبخەین، ئەمەش سەرەتابێت بۆ ئه و قۆناغە نوێیەی کە پێویستمانە.
بەڕێزان ڕۆژنامەنووسان و دەزگاکانی ڕاگەیاندن
هاتنی ڤایرۆسی کۆرۆنا، یەک خاڵی زۆر گەشاوەی بواری میدیایی بەبیری هەمومان هێنایەوە، ئەویش ئەوەبوو، کە لە هەموو بوارەکاندا و بەتایبەتی لەبواری میدیاییدا، گەر تواناکانمان یەک بخەین و خەمی خەڵک پێشبخەین، ئەوا دەتوانین ڕای گشتیش بەباشی ئاراستە بکەین و ژیانی سیاسی و حوکمڕانی و کۆمەڵایەتی لەهەرێمەکەمان باشتر بکەین.
سەبارەت بە کەناڵی ناوخۆیی (SPU HD) کە کەناڵی زانکۆی پۆلیتەکنیکی سلێمانی بوو.
بەڕێزان ئێمە بەهەوڵی هەموولایەک و شەونخونی بەڕێوەبەرایەتی ڕاگەیاندنمان و ڕێنوێنی و پێشنیارەکانی مامۆستایان و خوێندکارانی زانکۆمان و پشتیوانی تەواوی ئەندامانی ئەنجومەنی زانکۆمان و وەزارەتی خوێندنی باڵاو توێژینەوەی زانستی، توانیمان لە 31/1/2019 کەناڵی ناوخۆیی (SPU HD) بەئامادەبوونی وەزیری خوێندنی باڵاو توێژینەوەی زانستی (کابینەی ڕابردوو)و کەناڵەکانی ڕاگەیاندن و خوێندکاران و مامۆستایانی زانکۆمان بکەینەوە، ئەورۆژە باشم بیرە زۆرێک لەکادرەکانی زانکۆمان و بەتایبەتی بەڕێوەبەرایەتی ڕاگەیاندن و چالاکییەکان، بەگریانەوە دڵخۆشی خۆیان دەربڕی بەوەی کە:
• وەکو یەکەم زانکۆی حکومی لەهەرێمی کوردستان، بەداهاتی خۆمان، داهێنان بکەین و یەکەم کەناڵی تایبەت بەزانکۆو بەدروشمی (زانست – داهێنان) بکەینەوە.
• خوێندکاران و مامۆستایانی بەشەکانی ڕاگەیاندنمان دەرگایەکی گەورەیان بۆ کرایەوە بۆ ئەوەی بەکرداری و بەخستنەرووی بۆ هەمولایەک، کارەکانیان ئەنجامبدەن و بڵاوبکەنەوە، لەکەناڵەکەی خۆیانەوە.
• داهاتی زانکۆ لەکارێکدا بەکاردەهێنرێت کە سودی نەک تەنها بۆ زانکۆ بۆ هەموو کۆمەڵگە دەبێت.
• یەکەم کەناڵی زانستی – زانکۆیی دەکرێتەوە، کە دەبێتە کەناڵی ئەکادیمیان و زانست خوازان و لەسلێمانییەوە پەیامەکانیان بەگوێی هەموو کوردستاندا دەدات.
• وتمان، ئەم کەناڵە بەهاوکاری هەموولایەک دەتوانێت باشتر پەیامی وەزارەتی خوێندنی باڵاو توێژینەوەی زانستی و زانکۆکان بگەیەنێت و ڕونتر هەڵسەنگاندنی بۆ بکات و بەپێچەوانەشەوە.
• وتمان، ئەم کەناڵە دەبێتە کەناڵی خوێندکاران و چیتر هیچ میدیایەک ناتوانێت بەئارەزووی خۆی و بۆ مەرامی تایبەتی و سیاسی، خوێندکار ئاراستە بکات و بەکاری بهێنێت، بەڵکو ئێمە دەبینە دەنگی خوێندکار.
بەڕێزان...
هەر بۆ بەرچاورونیتان، ئێمە بەمووچەی فەرمانبەران خۆیان کارەکانمان دەکرد، هەندێک کەسی تەکنیکیمان لەدەرەوەی زانکۆ کە خەڵکانی پرۆفێشناڵبوون و دەرچووی کۆلێج و پەیمانگابوون بەگرێبەست هێناو کاریان لەگەڵمان کرد، کە بەراستی جێ دەستیان ئێستاش دیاره و ئێستاش سوودیان لێدەبینین، ئه و بودجەیەی کە بۆ کەناڵەکەش خەرج دەکرا بڕێکی زۆر کەمبوو، کە مانگانە کاروباری کەناڵی پێ بەڕێدەخرا، من دڵنیام و دەشزانم دەیان ئیشوکاریان بۆ کەناڵ کردووە، کە دواجار بۆ ئەوەی پارەیەکی زیاتر خەرج نەکەن بەسکی برسییەوە گەڕاونەتەوە بۆ ماڵەکانیان.
بۆ زانیاریتان، ئه و کەناڵە تەنها یەک ئۆتۆمبێلی هەبوو، لەکاتێکدا هەفتانە 8 بەرنامەیان دەکرد، لە 13 کەمپی زانکۆمان، لە 2 پارێزگا و 5 قەزای سنوری پارێزگای سلێمانی، ئەوان زۆربەی ئیشەکانیان بەئۆتۆمبێلی خۆشیان دەکرد، بێ ئەوەی 1 دینار بۆ بەنزین و ماندوبونیان خەرجبکرێت.
گرنگی ئه و کەناڵە بۆ ئێستا چی دەبوو؟
ئێستا بەهۆی لێکەوتەکانی ڤایرۆسی کۆرۆناوە، خوێندن لەهەموو دونیاداو لەهەرێمی کوردستانێش ڕووبەرووی قەیران بووەتەوە، بەجۆرێک خوێندنی ئەلیکترۆنی بەپاڵپشتی خوێندنی نێو کەمپەکان دادەنرێت، ئەمەش گرفتی زۆری هەیە، بەجۆرێک ڕەنگە هەموو خوێندکارێک و کەسوکاریان نەتوانن پێویستی ئه و خوێندنە دابین بکەن، بەڵام ئەوەی کارەکەی ئاسان دەکردو قورسی سەرشانی کەسوکاری خوێندکاران و تەنانەت زانکۆکانیشی کەمدەکردەوە، کەناڵی (SPU HD) بوو، بەجۆرێک کە دەمانتوانی، وانەکانی خوێندکاران، وانە کرداری و ئاساییەکانیش تۆماربکەین و لەکەناڵەکەوە بۆ خوێندکارانی پەخش بکەین، کە ئەمەش هیچ بارگرانییەکی دروست نەدەکرد بۆ خوێندکاران و کەسوکاریان، تەنها بوونی کارەبا بەسبوو بۆ ئەوەی خوێندکار لەماوەی 24 کاتژمێردا چەند جارێک وانەکانی ببینێت و دانەبڕێت لەخوێندن.
چۆن داخرا؟ !!
پاش ئەوەی وەزارەتی دارایی حکومەتی هەرێمی کوردستان لەکابینەی نوێدا بڕیاریدا، دەست بخاتە نێو هەموو داهاتێک، پاش ئەوەی سەربەخۆیی دارایی زانکۆکانی بەڕەوا نەبینی، پاش ئەوەی پێی وابوو کە ئەگەر شوێنێک هەبێت خۆی بژیەنێت ئەوا کوفری داراییه و حکومەتە لەنێو حکومەتدا، هاتن و دەستیان خستە بیناقاقەی زانکۆکان و لەنێویشیداو بێ گوێدانە گرنگی کەناڵەکە، سەرچاوەی دارایی ئه و کەناڵەشیان بڕی و تاکە کەناڵی زانستی – زانکۆییان لەسەر ئاستی کوردستان بەزانکۆمان و بەسلێمانی ڕەوا نەبینی، هەربۆیە پاش 6 مانگ کەناڵەکە داخرا، دواتر بەنیوهێنده و کەمتری هەمان پارەی ڕابردوو کەناڵەکەمان خستەوە سەرپێ و دڵسۆزەکانی بێ گوێدانە پارە، هاتنەوه و کەناڵیان کردەوە، بەڵام دیسانەوه و پاش 2 مانگ هەمان کارەسات بەسەر کەناڵدا هاتەوه و بۆ دواجارو بەیەکجاری داخرا، بەجۆرێک چیرۆکەکانی ڕۆژی داخستنی کەناڵەکه و گریان و هاواری کارمەندەکانی، ئێستاش کە بیری لێدەکەمەوە ناخم دەهەژێنێت و بۆ چەند ساتێک بێدەنگ دەبم.
ئەم کەناڵە توانیتی
• لەماوەی قەرانی دارایی و دانەمەزراندنی دەرچوواندا، 12 خوێندکاری دەرچوو بخاتەسەر کارو 10 خوێندکاری زانکۆمان لەبەشە جیاوازەکانی تەندروستی و (IT) و میدیاو چەندین مامۆستامان تواناکانیان بەگەڕبخەن و ببنە سەرچاوەی زانیاری دروست و زانستی بۆ کۆمەڵگە.
• ئەم کەناڵە لەماوەی کارکردنیدا 6 دۆکیومێنتەری لەبوارەکانی (ئەنفال، کیمیاباران، جووەکانی کوردستان، سەرای سلێمانی) پێشکەش کرد.
• توانیتی 35 بەرنامەی تەندروستی پێشکەشبکات، لەئاماده و پێشکەشکردنی خوێندکارانی بەشی تەکنیکی تەندوستی زانکۆمان، بەبەشداری مامۆستایانی زانکۆمان.
• 28 بەرنامەی تەکنۆلۆجی لە ئاماده و پێشکەشکردنی خوێندکارانی بەشی ئینفۆرماتیک و زانستی کۆمپیوتەری زانکۆمان، بەبەشداری مامۆستایانی زانکۆمان.
• لەبواری کشتوکاڵیدا 10 بەرنامە.
• لەبواری بنکۆڵکاری ڕۆژنامەوانیدا 8 بەرنامە.
• لەبواری ناساندنی زانا جیهانییەکاندا 28 بەرنامە.
• کەناڵ توانیتی 5 کۆنفرانسی نێودەوڵەتی زانکۆمان ڕاستەوخۆ بگوازێتەوه و چەند کەناڵێکی ئاسمانیش لەئێمەوە وەریانگرتۆتەوە.
• زیاتر لە 20 سیمپۆزیۆمی ڕیکۆردو مۆنتاژ کردووه و گواستۆتەوە بۆ بینەر.
• بۆ ناساندنی بەشەکانی زانکۆ بەخوێندکارو کۆمەڵگە زیاتر لە 30 بەرنامە کراون.
• سەرجەم چالاکییە زانستییەکانی زانکۆمان تۆمارکراون و لەرێی کەناڵەوە پەخشکراون.
• کۆنفرانسی زانکۆ تەکنیکییەکان کە لەشاری هەولێر بۆ ماوەی 2 ڕۆژ ڕاستەوخۆ پەخشکراون.
• کۆنگره و کۆنفراسە تەکنۆلۆجییە نێودەوڵەتییەکان پەخشکراو بەراستەوخۆ.
• تواناو بەهرەکانی خوێندکاران و مامۆستایانمان گەیاندە بینەر بەچەندین بەرنامە.
• بەبەرنامەی تایبەت ڕێزمان لەماندوەوەکانی زانکۆمان گرت و فەرمانبەرانی بەخزمەتی زانکۆمان ناساند.
• ئێمە توێژینەوەکانی زانکۆمان کرد بەڤیدیۆو گەیاندمان بەکۆمەڵگە.
• ئێمە پەیامی وەزارەتی خوێندنی باڵاو توێژینەوەی زانستیمان بەراستەوخۆ گواستووەتەوه و دەیان کۆنگرەی ڕاستەوخۆی وەزارەت ڕوماڵ کراون.
• لەسەردانیاندا هەردوو وەزیری خوێندنی باڵاو توێژینەوەی زانستی ئەم کابینەیه و کابینەی ڕابردووش، دەستخۆشی گەرمیان لێکردوین و بەڵێنیان دەدا کە هاوکاری ئەم کەناڵە دەکەن و بەرەوپێشی دەبەن !
زۆر بەڕاشکاوی دەڵێین
کە چەندین نوسراومان بۆ وەزارەتی خوێندنی باڵاو توێژینەوەی زانستی و وەزارەتی دارایی کردووه و تەواوی ڕونکردنەوەکانمان خستووەتەڕوو، بەڵام بەداخەوە وەزارەتی دارایی ئامادەنییە هەنگاومان لەگەڵبنێت، لەکاتێکدا ئێمە دڵنیاین ئەگەر ئه و کەناڵە لە شوێنێکی ترو لەزانکۆیەکی ترو شارێکی تربوایە، نەک ئاوهای لێ نەدەکرا، بەڵکو گەورەترو بەهێزترو پڕ (پارە) تر دەکرا.
پ.ی.د.ئالان فەرەیدون عەلی ئەمین
سەرۆکی زانکۆی پۆلیتەکنیکی سلێمانی[1]
#22-04-2020#