Bi armanca pêşxistina çanda hunera şêwekariyê li bakur û rojhilatê Sûriyê her sal pêşangeha hunera şêwekariyê tê lidarxistin. Îsal jî bi tevlîbûna 139 şêwekaran pêşangeha 6`an ya hunera şêwekariyê li bajarê Qamişlo hat lidarxistin.

Desteya Çandê ya Bakur û Rojhilatê Sûriyê bi hevkariya Desteya Çandê ya Herêma Cizîrê 18`ê vê heyvê Pêşangeha 6`an ya Hunera Şêwekariyê li Navenda Mihemed Şêxo ya bajarê Qamişlo vekir û wê di 20`ê heyvê bi dawî bibe. Di pêşangehê de 139 şêwkar ji wan 71 şêwekarên jin beşdar bûne, heriwha 139 tablo û 6 peykerên ku ji aliyê şêwekaran ve hatine çêkirin, hatin pêşkêşkirin.
Têkîldarî mijarê û armanca lidarxistina pêşangehê, herwiha giringiya wê li ser civakê bi taybet li ser şêwekaran, Cîgira Hevserokatiya Desteya Çandê ya bakur û rojhilatê Sûriyê Ronahî Hesen ji me re axivî û nêrînên xwe anî ser ziman.[1]

`Armanc pêşxistin û parastina çanda şêwekariyê ye`
Ronahî Hesen got, armanca me ji pêşangehê, piştgiriya şêwakaran ji aliyê hunera wan û pêşxistina asta hunera şêwekariyê li herêmên bakur û rojhilatê Sûriye ye. Da ku çanda şêwekariyê di nava civakê pêş bikeve û were parastin. Ev pêşangeh li ser asta bakur û rojhilatê Sûriyê bi giştî ye. Wek her şêwekar ji her deverên bakur û rojhilatê Sûriyê yên kurd, Ereb û Suryan jî tevlî pêşangehê bûne û tevlîbûna wan ya îsal ji ya salên derbasbûyî zêdetir e. Jixwe ne her şêwekar dikare tevlî pêşangehê bibe, çimkî komîteya me ya nirxandinê hebû li gorî nirxandina tabloyê şêwekar tevlê bûne. Her şêwekar bi tabloyek beşdar bûye.”[1]
Cûdahiya pêşangeha 6an ji pêşangehên salên berê

Rûnahî diyar kir ku pêşangeha şêwekariyê ya 6`an bi tabloyên xwe ji salên borî cûdatir e û ev yek li axaftina xwe zêde kir: “Ji ber ku jimara şêwekaran îsal ji salên berê zêdetir e, xêzkirina wêneyan jî ji hev cuda ne û biwatetir in. Tevayiya wêneyên ku di pêşangehê de hatine pêşkêşkirin li ser jin û civakê ne û her wêne peyameke cûda dide. Hin şêwekar jî li ser bûyerên di dema dawî de çêbûyîn, weke dagîrkirin, kuştin û koçberkirinê wêne xêz kirine. Ev jî tê wateya ku hunermend bi şêwekariya xwe hest û ramanên xwe bi hunera xwe derdixe. Me xwest bi van wêneyan em bandorê li civakê bikin, da ku civak jî bikeve nava kurahiya hunerê de û çanda xwe nas bike.”

`Parastina hunerê parastina civakê ye`

Ronahî hesen da zanîn ku parastina hunerê parastina civakê ye û wiha dirêjî da axaftina xwe: “Çalakiyên bi vî rengî ji bo pêşxistina civakê pir girîng in, çimkî çand û huner nasnameyên civakê ne û hebûna vê civakê diparêze, herwiha civakê ji koletiyê xilas dike û mirovan bi pêş dixe. Ji bo wê çiqas çalakiyên hunerê pêş bikevin ewqas civak jî pêş dikeve.”
Di dawiyê de Cîgira Hevserokatiya Desteya Çandê ya bakur û rojhilatê Sûriyê Ronahî Hesen, bîr xist ku wê pêşangeh 20`ê Gulanê bi xelatkirina 20 şêwekaran û bi dawî bibe. Herwiha got, Em bi vekirina pêşangehên wisa pir kêfxweş dibin. Çimkî bi riya pêşangehê hunermendên me jî hest û keda xwe ya di salan pêşkêş dikin, ev bixwe bandoreke erênî li gel dike û ji bo cîhanê jî peyameke girîng e.