عیسا شەمعون، نوونەرێ مەسیحیان ل قەزا شنگال چاڤپێکەڤتنەکێدا بۆ (باسنیوز) دیارکر: 52 مالێن مەسیحیان ل شنگال هەبوون کو تیرۆرستێن داعش سێ کەنیسەیێن مەسیحیان تێکدان و خراب کرینە و پتر ژ 20 کەسێن مەسیحى هاتینە گرتن و رەڤاندن و چار کەس هەتا نۆکە دیار نینن.
(باسنیوز) چەند خێزانێن مەسیحى ل شنگال هەبوون چ زیان لسەر دەمێ تیرۆرستێن داعش گەهشتییە مەسیحیان؟
عیسا شەمعون: سەرەدەمێ تیرۆرستێن داعش مەسیحى ژى تووشى زیانەکا مەزن بوون ل شنگال مخابن مەسیحیێن شنگال یێن هاتینە ژبیر کرن. هەتا نوکە تشتەک بۆ مەسیحیان نەهاتیە کرن کو پتر ژ 20 کەسێن مەسیحى کەڤتنە دەستێن تیرۆرستێن داعش دا وچار کەسێن مەسیحى هاتینە بێ سەروشینکرن، هەتا نوکە ژى چارەنڤیسێ سێ کەسان دیارنەبووینە و هەموو خانیێن مەسیحیان یێن هاتینە خرابکرن وسۆتن. مالا من بخۆ ل شنگال دگەل هەموو کەل وپەلێن ناڤمالى بن دەستێ تیرۆرستێن داعش دا هاتیە سۆتن هەتا نوکە ژى بەغدا هەڤکاریا مە نەکریه. ئەم ژى حالێ خۆ ب حالێ هەموو خەلکێ شنگال دانن هەردەمێ ئێزدى و تورکمان زڤرینە شنگال ئەم ژى وەکو مەسیحى دێ زڤرینە شنگال.
(باسنیوز) خەلکێ مەسیحى ل شنگال چ هیڤى ب حکومەتا عێراقى هەنە؟
عیسا شەمعون: ئەم هیڤى نە دەمێ پەرلەمانێ نوو یێ عێراقێ دەستبکار بیت تشتەکى باش بۆ شنگال بکەن ژبەر کو خولا بەرى نوکە دا نوونەرێن خەلکێ شنگال پەرلەمانێ عیراقێ دا نەبوون لێ بۆ پەرلەمانێ نوو سێ کاندیدێن پارتى ل شنگال چووینە پەرلەمانێ. ئەم هیڤى نە کاندیدێن پارتى ل پەرلەمانێ عێراقێ کارەکى باش بۆ شنگال بکەن یا وەکو دیتر یا زەحمەتە بەغدا تشتەکێ بکەت.
(باسنیوز) چەند خێزانێن مەسیحی زڤرینە شنگال بۆچى نەشێن ڤەگەرنە سەر مالێن خۆ؟
عیسا شەمعون: ل شنگال 52 مالێن مەسیحیان هەبوون بەرێ تیرۆرستێن داعش هێرشى سەر شنگال بکەن لێ پشتى تیرۆرستێن داعش هێرشى سەر شنگال کرین مەسیحى ژى ئاوارەبووینە هەرێما کوردستانێ. نوکە گەلەک خێزانێن مەسیحیان ل دهۆکێ و هەولێر ئاکنجی کرینە و هندەک خێزانێن مەسیحیان چووینە ئورو‌پا یێن ماین ژى خانى کرێ کرینە ناڤ دا ئاکنجی نە کو مەسیحى ژى وەکو هەموو پێکهاتێن دی یێن شنگال نەشێن بزڤرنە سەر مالێن خۆ ل شنگال هەتا رەوشا ئەمنی ل شنگال چارەسەر بیت وئاڤەدانى ل شنگال دەست پێ بکەت. سەرجەمێ 52 مالێن مەسیحیان بتنێ مالەکا مەسیحیان چووینە شنگال ئەوژى نەچووینە ناڤ سەنتەرێ شنگال دا بەلکو ل ناحیا سنوونێ ئاکنجى بووینە مەسیحى ژى ل هیڤیا حکومەتا عێراقى نە کاربکەت بۆ دابینکرنا تەناهى ل شنگال داکو ئەم ژى بزڤرنیە سەر مالێن خۆ هەتا رەوشا شنگال چارەسەر نەبیت مەسیحى نازڤرنە شنگال.
(باسنیوز) تیرۆرستێن داعش چەند کەنیسەیێن مەسیحیان ل شنگال تێک دان؟
عیسا شەمعون: سێ کەنیسەیێن مەسیحیان ل شنگال هەبوون هەر سێ هاتینە تێکدان و خرابکرن هەتا نوکە ژى رێکخراوێن نێڤدەولەتى کار نەکرینە بۆ چێکرنا کەنیسەیێن مەسیحیان ل شنگال ئەوژى چونکو مەسیحى نەزڤرینە شنگال هەتا خەلک نەزڤرتە سەر مالێن خۆ یا زەحمەتە رێکخراو ژى بشێن بچنە شنگال پێدڤیە تەناهى ل شنگال بهێتە دابینکرن خەلک ڤەگەرن پاشێ کەنیسە بهێنە چێکرن. [1]